रूपन्देहीको तिलोत्तमामा कांग्रेस कार्यकर्ताहरूले एमालेका कार्यकर्तामाथि आक्रमण गरेका छन् । 

कांग्रेस कार्यकताको आक्रमणमा परेर तिलोत्तमा–१६ का सन्जीव भण्डारी र सागर रेग्मी घाइते भएका छन् । सन्जीव र सागर एमालेका कार्यकर्ता हुन् । 

आक्रमणबाट भण्डारीको कान, छाती र टाउकोको पछाडि गहिरो चोट लागेको छ । रेग्मीको अवस्था भने सामान्य छ । घाइते भण्डारीको अहिले क्रिमसन अस्पताल मणिग्राममा उपचार भइरहेको छ ।

सोमवार राति साढे ११ बजेतिर आएका स्थानीय सन्जीव भुसाल, प्रवीन खड्का, ईश्वर केसी, लक्ष्मण रानालगायतको समूहले उनीहरूमाथि आक्रमण गरेको एमालेका कार्यकर्ताहरूले बताएका छन् । 

आक्रमण गर्ने भुसाल वडा नं. १६ मा नेपाली कांग्रेसबाट वडाध्यक्षमा उम्मेदवार बनेका झविलाल भुसालका छोरा हुन् । 

एमाले तिलोत्तमा नगरपालिकाका निर्वाचन परिचालन कमिटी संयोजक वासुदेव घिमिरेले पराजयको डरले कांग्रेस कार्यकर्ता आक्रमणमा उत्रिन थालेको आरोप लगाए । 

इलाका प्रहरी कार्यालय, मंगलापुरले उक्त घटनाका विषयमा थप अनुसन्धान भइरहेको जनाएको छ । 

इलाका प्रहरी कार्यालय मंगलापुरका प्रहरी नायव निरीक्षक लक्ष्मण डाँगीले घटनाका विषयमा मंगलापुर प्रहरीमा उजुरी लिन नमिल्ने भएकाले उजुरीका लागि बुटवल जान आग्रह गरिएको बताए ।

उनले कांग्रेस कार्यकर्ताबाट एमाले कार्यकर्ता पिटिएको स्वीकार गर्दै यस विषयमा अनुसन्धानपछि मात्र विस्तृत थाहा हुने बताए । घटना रातिको भए पनि अहिलेसम्म प्रहरीले घटनामा संलग्न कसैलाई पक्राउ गरेको छैन ।

तिलोत्तमा गृहमन्त्री बालकृष्ण खाणको गृहनगर हो । गृहमन्त्री अहिले गृहजिल्लामा नै छन् । 

तिलोत्तमामा नेपाली कांग्रेस र माओवादी केन्द्रको गठबन्धनबाट गृहमन्त्री खाणका भाइ रामकृष्ण खाण र एमालेको तर्फबाट मोहन चापागाईं नगर प्रमुखमा उम्मेदवार बनेका छन् ।

एमाले रूपन्देहीका अध्यक्ष तेजेन्द्र केसीले गृहमन्त्री खाणकै गृहनगरमा विपक्षी पार्टीका कार्यकर्तामाथि आक्रमण शुरू भएपछि शान्ति सुरक्षामै गम्भीर प्रश्न उब्जिएको बताए । उनले यस्ता घटना तत्काल रोक्न आग्रह गरे ।