रूपन्देहीको कोटहीमाई गाउँपालिकाको अध्यक्षमा नेकपा एमालेबाट श्यामसुन्दर यादव उम्मेदवार छन् । उनी उमेरले २१ वर्षका भए ।

चुनावी प्रतिस्पर्धामा ७० वर्षमाथिसम्मका उम्मेदवार समेत रहेका पालिकामा यादव सबैभन्दा कान्छा उम्मेदवारमा पर्छन् । 

जिल्लाको मधेश बाहुल दक्षिणी क्षेत्र कोटहीमाईमा पाका र पुराना पुस्तको भीडमा उनी कान्छा उम्मेदवार यादव सबै दलका लागि चुनौती बनेर उभिएका छन् । पालिकामा कुनै दलको पनि चुनावी तालमेल छैन, दलहरू छुट्टाछुट्टै रूपमा चुनावी मैदानमा होमिएका छन् । समाजमा देखिएको विकृति र भ्रष्ट आचरणलाई परिवर्तन गर्न आफू राजनीतिमा होमिएको उम्मेदवार यादवले बताए ।

उनको आक्रामक चुनावी प्रचार शैली देखेर कोटहीमाई गाउँपालिकामा कांग्रेस, जनता समाजवादी पार्टी (जसपा), नेकपा माओवादी केन्द्रसहितका दलका नेताहरू त्रसित छन् । यादवले केही समयअघिसम्म राजनीति गर्छु भन्ने सोच समेत बनाएका थिएनन् । 

‘तराई मधेश केन्द्रित नेताहरूले जनतालाई प्रयोग गरेर नेताहरूले आफ्नो गोजी भरे,’ यादव भन्छन्, ‘विकासको प्रमुख आधार शिक्षा, स्वास्थ्य, यातायातमा तराई यति पछाडि छ कि प्रतिशतमा भन्नुपर्दा १ प्रतिशत पनि काम भएको छैन । यी कामको सुधार गर्न लागि राजनीतिमा आएँ ।’ चुनाव प्रचारप्रसारको अन्त्यतिर उनी घरदैलोमा व्यस्त छन् ।

‘समाजमा देखिएको विकृति र भ्रष्टाचारलाई युवाहरूले राजनीतिमा लागेर परिवर्तन गर्नुपर्छ भन्ने सोच आयो,’ यादव भन्छन्, ‘सबै दलका एजेण्डा र सिद्धान्त पढे पनि राम्रो चाहिँ एमालेको लाग्यो । एमालेको नीति, सिद्धान्त र विचारले मन छोयो । त्यसपछि एमाले पार्टी रोजेर राजनीतिमा होमिएँ । पार्टीले टिकट पनि दियो ।’ स्थानीय तहमा धेरै भ्रष्टाचार देखिएको उनले बताए ।

कोटहीमाई गाउँपालिमा २०७४ सालको निर्वाचनमा जसपाबाट अध्यक्षमा चन्द्रभुषण यादव र उपाध्यक्षमा मानमति बानिया विजयी भएका थिए । बानिया अहिले राष्ट्रिय प्रजातन्त्र पार्टी (राप्रपा) मा लागेकी छन् ।

पालिकाका जनप्रतिनिधिले विगत ५ वर्षमा गरेको व्यवहारले पालिकावासी दिक्क भएकाले यसपटक युवा उम्मेदवारलाई पालिकावासीले रोज्ने उनको विश्वास छ । आइतवार एमाले अध्यक्ष केपी शर्मा ओली बुटवलमा चुनावी सभामा आउँदा सबै पालिकाका उम्मेदवारको परिचय कार्यक्रममा कान्छा उम्मेदवारका रूपमा यादव सबैको नजरमा परेका छन् । 

सबै दलका उम्मेदवार जस्तै उनी पनि मतदाताको घरघरमा पुगेर मत माग्ने अन्तिम दौडधुपमा व्यस्त छन् । ‘बुढापाकाले आफ्नो गोजी मात्र भरे, युवा आए गाउँको विकास हुन्छ भनेर घरदैलामा पुग्दा जनताले भनेका छन् । म जित्नेमा ढुक्क छु । समुदायका मतदाताले माया गर्नुभएको छ, मैले समाजमा गरेका काम देख्नुभएको छ,’ उनले भने ।

सुन्दर विगतमा कुनै पार्टीमा सक्रिय थिएनन्, परिवारका सबैको सहयोग पाएपछि आफू राजनीतिको मैदानमा आएको उनले बताए । ‘युवाले पढेर भ्रष्टाचार अन्त्य हुने होइन रहेछ, राजनीतिमै लाग्नुपर्ने रहेछ,’ उनले भने, ‘समाज बदल्ने सपना बोकेर राजनीतिमा होमिएको छु, हेरौं के हुन्छ ?’

गाउँमा निःशुल्क एम्बुलेन्स सेवा, किसानलाई निःशुल्क बिउबिजन र सामुदायिक विद्यालय सुधार्न अब्बल शिक्षक ल्याएर पठनपाठन सुधार गर्ने योजना उनले ल्याएका छन् । उनी पार्टीको गाउँ कमिटी सदस्य रहेका छन् ।

एमाले जिल्ला अध्यक्ष तेजेन्द्र केसीले श्यामसुन्दरमा ठूलो राजनीतिक सम्भावना भएको युवा देखेकाले कलिलै उम्मेदवारमा उम्मेदवार बनाइएको बताए ।

गाउँपालिकाको उपाध्यक्षमा एमालेले माया साहनीलाई अगाडि सारेको छ । साहनी सबैको रोजाइकी नेत्री भएकाले कोटहीमाईमा जीत निकाल्ने दाबी गरे । अध्यक्ष केसीले एमालेले जिल्लाका १४ पालिका सहज रूपमा जित्ने बताएका छन् ।