नेकपा (एमाले)का अध्यक्ष केपी शर्मा ओलीले स्थानीय निर्वाचनले नै देश कतातिर लैजाने भन्ने निर्धारण गर्ने बताएका छन् । एमाले काठमाडौँले आज आयोजना गरेको आमसभामा सम्बोधन गर्दै उनले स्थानीय निर्वाचनले  केन्द्रीय र प्रादेशिक सरकार हेरफेर नगरे पनि देशको दिशा तय गर्ने उल्लेख गरे। एमालेले देशलाई चौतर्फी ढङ्गबाट विकास गर्ने हुँदा सबैतिर रुचाइएको उनले दाबी गरे। उनले भने, “सबै पेसा र व्यवसायका हित अघि बढाउन एमाले नै चाहिन्छ भन्ने सबैको बुझाइ छ ।” 

एमाले नेतृत्वको सरकारले के के ग¥यो र विकासको अभियान कसरी अघि बढाएको जनतालाई थाहाभएको पूर्वप्रधानमन्त्री ओलीले बताए । ऐतिहासिक र पुरातात्विक महत्वका धरोहर, धार्मिक आस्था, परम्परा, संस्कृति र संस्कारसँग जोडिएका कुराको रक्षा एमालेले नै गरेको उनको भनाइ छ  । एमालेले इतिहासको छापका रुपमा रहेको धरहरा उठाएको, रानीपोखरी पुनःनिर्माण गरेको र काष्ठमण्डप पुनःनिर्माण गरेको उनले बताए । उनले भने, “इतिहासको संरक्षण र सम्पदाको संरक्षण गरेका छौँ ।”

आफू नेतृत्वको सरकारले नै ६० वर्षअघि देखि गुमाएको भूभाग समेटेर नक्सा छापेको र सर्वसम्मतिले संविधान संशोधन गरेको ओलीले बताए । त्यसैका आधारमा अब कसैले पनि गुमाएको भूभाग सधैँका पचाउन नसक्ने उनले बताए । एमाले सरकारले विभिन्न सडक निर्माण र विस्तार, विमानस्थल निर्माण लगायतका पूर्वाधार निर्माणलाई अघि बढाएको उनले बताए । 

कार्यक्रममा महानगरपालिकामा प्रमुखका उम्मेदवार केशव स्थापित र उपप्रमुखकी उम्मेदवार सुनिता डङ्गोलले निर्वाचित भएपछि काठमाडौँ सफा र सुन्दर बनाउन ध्यान दिने उल्लेख गरे ।