अभिनेत्री पूजा शर्मा र अभिनेता आकाश श्रेष्ठको मुख्य भूमिका रहेको चलचित्र ‘सम्झना बिर्सना’को प्रदर्शन मिति पछि सरेको छ । 

आउँदो जेठ ६ गतेका लागि तोकिएको पूर्वनिर्धारित प्रदर्शन मिति स्थगित गरिएको निर्देशक निमेष प्रधानले जानकारी दिए । 

उनका अनुसार स्थानीय तह निर्वाचनको माहोललाई मध्येनजर गर्दै जेठ ६ मा चलचित्र प्रदर्शन नगर्ने निर्णय गरिएको हो । 

‘अहिले सबैतिर निर्वाचनको माहोल छ । यो माहोलमा हामीले चलचित्रको प्रमोशन गर्ने समय पाएनौं । हामीलाई पनि रिस्क देखियो’ निर्देशन प्रधानले लोकान्तरसँग भने, ‘सोही कारण चलचित्र जेठ ६ गतेबाट पोस्टपोन्ड गरेका छौं ।’ 

आज (बुधबार) वितरकसँग छलफल रहेको बताउँदै भोलिसम्ममा नयाँ प्रदर्शन मिति सार्वजनिक गरिने उनले बताए । 

उनका अनुसार अब चलचित्र लगत्तै प्रदर्शनमा आउने सम्भावना भने एकदम कम छ । ‘अन्य चलचित्रहरूले प्रदर्शनका लागि डेट हालिसकेका छन् । उनीहरूसँग जुधाउन त मिलेन,’ प्रधानले भने, ‘कुनै पनि नेपाली चलचित्रलाई असर नहोस् भन्ने सोच हो । त्यसैले अब सोहीअनुसारको डेट मिलाउँदा केही महिना नै पछाडि धकेलिन्छ होला ।’

प्रेमकथामा निर्माण गरिएको चलचित्रको कथा निर्देशक प्रधान स्वयंमले लेखेका हुन् । आदित्य प्रधान र रेविका प्रधान निर्माता रहेको चलचित्रमा आकाश र पूजाका अलावा छुल्ठिम गुरुङ, सुनिल थापा, शिशिर राणा लगायतका कलाकारहरुको समेत अभिनय छ ।

‘आदित्य फिल्मस्’को ब्यानरमा निर्माण भएको चलचित्रलाई शिव ढकालले छायांकन, कमल राईले कोरियोग्राफी एवं तारा थापा ‘किम्भे’ले सम्पादन गरेका हुन् । 

भारतको सिलिगुडी, दार्जिलिङ र सिक्किम क्षेत्रमा यो चलचित्रको छायांकन गरिएको हो । स्थानीय तह निर्वाचनका कारण आगामी शुक्रबार कुनै पनि नेपाली चलचित्र प्रदर्शनमा आउने छैनन् । अर्को शुक्रबार अर्थात जेठ ६ मा भने ‘सम्झना बिर्सना’ प्रदर्शनमा नआउने भएपनि अर्को चलचित्र ‘लाइफ इन एलए’ भने प्रदर्शन हुनेछ ।