०९ साउन २०८३, शनिबार
वैकल्पिक राजनीतिको वकालत गर्दै आएको विवेकशील साझा पार्टीको अवस्था लज्जास्पद देखिएको छ ।
आइतवार दिउँसोसम्मको प्रारम्भिक नतिजामा साझाको अवस्था नाजुक देखिएको हो । काठमाडौं महानगरमा ७ हजार मत गणना हुँदा साझाकी उम्मेदवार छैटौं स्थानमा छिन् । स्वतन्त्र उम्मेदवार बालेन शाहले २ हजार ८ सय मत प्राप्त गर्दा साझाकी समीक्षा बास्कोटाले मात्र २३ भोट पाएकी छिन् । उनी भन्दा स्वतन्त्र उम्मेदवार सुमन सायमीले १६५ मत पाएका छन् ।
उपमेयरमा सुनिता डंगोलले २ हजार भोट पाउँदा साझाकी कृति कंशाकारले मात्र ३५ भोट पाएकी छिन् ।
काठमाडौंको बूढानीलकण्ठ नगरपालिकामा खेमकुमारी भुर्तेलले ७ औं स्थानमा रहँदै ७ भोट पाएकी छिन्, जबकि यही क्षेत्रमा मेयरका स्वतन्त्र उम्मेदवार सुमित खरेलले ४ सय मत पाएका छन् ।
पोखरा उपमहानगरमा पनि साझाले पाएको भोट लज्जास्पद देखिएको छ । गठबन्धनका धनराज आचार्यले १ हजार १ सय २१ मत पाउँदा साझाकी सुशीला केसीले ८ भोट पाएकी छिन्, जबकि स्वतन्त्र उम्मेदवार खड्कराज गौडेल (गनेस)ले ६५ र राप्रपाका शंकर खरालले १८४ मत पाएका छन् ।
चितवनको भरतपुरमा ४ हजार ८ सय मत गन्दा साझाका प्रविन काफ्लेले ८ भोट पाएका छन्, जबकि स्वतन्त्र उम्मेदवार जगन्नाथ पौडेलले ५ सय ७९ मत पाएका छन् ।
२०७४ सालको स्थानीय तह निर्वाचनमा काठमाडौंमा विवेकशील र साझाका उम्मेदवारले राम्रो भोट पाएका थिए । त्यसपछि साझा र विवेकशील पार्टी एक भएर चुनाव लड्दा काठमाडौं १ मा रवीन्द्र मिश्रले कांग्रेस उम्मेदवार प्रकाशमान सिंहलाई धक्का दिएका थिए ।
चुनावमा पराजित भएको केही समयमै विवेकशील साझा विभाजित भयो । त्यसको असर स्थानीय तह निर्वाचनमा देखिएको छ ।
‘मान्छेमा इमान्दारी भए सचेत जनताले पत्याउँदा रहेछन् भन्ने उदाहरण बालेन शाह हुन् । रवीन्द्रजीहरूले वैकल्पिक राजनीतिलाई धमिल्याउनुभयो,’ साझा पार्टीबाट अलग्गिएका उनका एक पूर्व सहकर्मीले भने, ‘चुनावको पूर्वसन्ध्यामा राप्रपासँग एकताको चर्चापछि त्यो पार्टी वैकल्पिक राजनीतिको वकालत गर्न पनि योग्य रहेन ।’
