बुद्ध जयन्तीको अवसर पारेर सोमवार भारतीय प्रधानमन्त्री नरेन्द्र मोदी लुम्बिनी आउँदैछन् ।

मोदी भ्रमणलाई लक्षित गरेर लुम्बिनीमा विशेष सुरक्षा व्यवस्था मिलाइएको छ भने मायादेवी मन्दिर परिसर र अन्तर्राष्ट्रिय ध्यान केन्द्रलाई विशेष रूपले सजाइएको छ ।

भारतका प्रधानमन्त्री नरेन्द्र मोदी नेपालको औपचारिक सांस्कृतिक भ्रमणको सिलसिलामा सोमवार बिहान ११ सदस्यीय प्रतिनिधिमण्डलको नेतृत्व गर्दै लुम्बिनी आउन लागेका हुन् । 

प्रतिनिधिमण्डलमा भारतका राष्ट्रिय सुरक्षा सल्लाहकार अजित डोभल, परराष्ट्र सचिव विनयमोहन क्वात्रा, विदेश मन्त्रालयका सहसचिवद्वय अनिन्दम बाग्ची र अनुराग श्रीवास्तव, प्रधानमन्त्री कार्यालयका सहसचिव रुद्रा गौरव श्रेष्ठलगायत रहने परराष्ट्र मन्त्रालयले जनाएको छ ।

भारतीय प्रधानमन्त्री मोदीलाई अन्तर्राष्ट्रिय वौद्ध प्रार्थना केन्द्र तथा प्रेक्षालय नजिक निर्माण गरिएको हेलिप्याडमा प्रधानमन्त्री शेरबहादुर देउवालगायतले स्वागत गर्ने कार्यक्रम छ ।

भारतीय सरकारका तर्फबाट अहिले हुन लागेको सांस्कृतिक भ्रमण ऐतिहासिक भएकाले पनि लुम्बिनी अहिले अन्तर्राष्ट्रिय चासोमा परेको छ । भारतीय चक्रवर्ती सम्राट अशोक, राजा कनिस्को र हर्षबद्र्धन पछिको ऐतिहासिक भ्रमण भारतीय प्रधानमन्त्री मोदीबाट हुँदैछ । 

कोषका उपाध्यक्ष शाक्यपुत्र भिक्षू मेत्तैयाका अनुसार लुम्बिनीमा छिमेकी मुलुकबाट धेरै वर्षपछि विशिष्ट र ऐतिहासिक भ्रमण हुँदैछ । बौद्ध विचारलाई अझ विश्वव्यापीकरण गर्न मित्रराष्ट्र भारतका प्रधानमन्त्री मोदीको भ्रमण एउटा कडी हुने भिक्षू मेत्तैयाको भनाइ छ ।

लुम्बिनीको पर्यटन प्रबद्र्धनका लागि विशिष्ट सांस्कृतिक भ्रमण महत्त्वपूर्ण कडी हुने र लुम्बिनी तीर्थस्थल मात्रै होइन, बौद्धमार्गीको स्थल मात्रै होइन र अन्तर्राष्ट्रिय केन्द्र पनि हो भन्ने कुराको बोध गराउन पनि यसप्रकारका भ्रमणले मद्दत गर्ने उनले बताए । 

लुम्बिनीको गुरुयोजना अनुरूपका काम पनि पूरा हुने चरणमा रहेको र लुम्बिनीमै अन्तर्राष्ट्रिय ध्यान केन्द्र समेत निर्माण भएको अवस्थामा मोदीको उच्चस्तरीय सांस्कृतिक भ्रमण हुन लागेको छ । 

लुम्बिनी विकास कोषका सदस्यसचिव सानुराजा शाक्यका अनुसार भारतका प्रधानमन्त्री मोदी सोमवार बिहान ११ बजे हेलिकप्टरबाट लुम्बिनी आइपुग्ने कार्यक्रम छ ।

कोषको गुरुयोजनामै रहेको हेलिप्याड अहिले तयार भएका छन्, अन्तर्राष्ट्रिय ध्यान केन्द्रको नजिकै रहेको हेलिप्याडमा ओर्लने कार्यक्रम छ । त्यहाँ नेपाल सरकारका तर्फबाट प्रधानमन्त्री देउवाले स्वागत गर्नेछन् ।