काठमाडौं महानगरपालिकाको मेयर पदमा स्वतन्त्र उम्मेदवार बालेन्द्र साह (बालेन शाह) ले फराकिलो अग्रता बनाएका छन् । यस्तै नेकपा एमालेबाट उपमेयरकी उम्मेदवार सुनिता डंगोलले पनि निकटतम् प्रतिद्वन्द्वीको भन्दा झण्डै तेब्बर बढी मत पाएकी छन् । 

शनिबार राति १० बजे जानकारी गराइएको आधिकारिक मतपरिणामअनुसार साहले ३४ हजार ९३५  मत पाएका छन् । जवकी उनका निकटतम् प्रतिद्वन्द्वी मेयरकी उम्मेदवार काँग्रेसकी सिर्जना श्रेष्ठले १९ हजार ३१५ मत पाएकी छन् । यस्तै एमालेका केशव स्थापितले १८ हजार ९७८ मत पाएका छन् । यस्तै राप्रपाका उम्मेदवारले  ३ हजार ८२ मत पाएका छन् । सिर्जना र साहबीचको मतान्तर १५ हजार ६२० रहेको छ । 

मुख्य निर्वाचन अधिकृतको कार्यालयका शाखा अधिकृत प्रेम कुमार श्रेष्ठका अनुसार उपमेयरकी उम्मेदवार सुनिताले ३४ हजार ३० मत पाउँदा गठबन्धनबाट उम्मेदवार बनेका एकीकृत समाजवादीका रामेश्वर श्रेष्ठले मात्र ११ हजार ८४२ मत पाएका छन् । यस्तै राप्रपाका उम्मेदवारको पक्षमा  ६ हजार ६७ मत प्राप्त भएको छ ।