आगामी आर्थिक वर्षको लागि सरकारले संसदमा पेश गरेको नीति तथा कार्यक्रम माथिको छलफल सम्पन्न भएको छ ।

राष्ट्रपति विद्यादेवी भण्डारीले गत मंगलबार संघीय संसदको दुवै सदनलाई संयुक्त रुपमा सम्बोधन गरेर सरकारको नीति तथा कार्यक्रम संसदमा प्रस्तुत गरेकी थिइन् । 

उक्त नीति तथा कार्यक्रममाथि बिहीबारबाट नियमित छलफल भएको थियो । सांसदहरुले नीति तथा कार्यक्रममाथि आफ्ना सुझाव प्रस्तुत गरेका थिए । 

नीति तथा कार्यक्रममाथिको छलफल सकिएपछि आजै पुन बस्ने गरी संसद बैठक १५ मिनेटको लागि स्थगित भएको छ । 

सभामुख अग्नीप्रसाद सापकोटाले बैठक १५ मिनेटपछि फेरि बस्ने गरी बैठक स्थगित गरेका हुन् । 

आजै पुनः बस्ने संसद बैठकमा छलफलका क्रममा नीति तथा कार्यक्रममाथि सांसदले उठाएको प्रश्नको जवाफ प्रधानमन्त्री शेरबहादुर देउवाले दिने कार्यक्रम छ  । प्रधानमन्त्री शेरबहादुर देउवाको सम्बोधन पछि सांसदहरुले प्रधानमन्त्रीलाई संसदमा प्रश्न सोध्न पाउनेछन् ।

ती प्रश्नको प्रधानमन्त्रीले जवाफ दिएपछि अर्थमन्त्री जनार्दन शर्माले चालू आर्थिक वर्षको आर्थिक सर्वेक्षण संसदमा पेश गर्ने कार्यसूची रहेको संसद सचिवालयले बताएको छ ।