मोरङ कटहरी गाउँपालिका–२, आदर्श टोलका ५० वर्षीय तुलसी श्रेष्ठको शव आइतवार बिहान फेला परेको छ । ‘भाइको कृषि फर्म जान्छु’ भनेर हिँडेका श्रेष्ठको हत्या गरेर फालेको प्रहरीले निष्कर्ष निकालेको छ । 

प्रहरीका अनुसार शनिवार राति साढे १० बजे घरदेखि करीब डेढ किलोमिटर उत्तर जमटोकी टोलको थानमार्गमा रहेको भाइ चित्रकुमार श्रेष्ठको कृषिफर्ममा जान्छु भनेर तुलसी हिँडेका थिए । 

उनको शव चित्रकुमारको कृषि फर्मदेखि करीब ५० मिटर दक्षिण बाँझो खेतबारीमा भेटिएको हो । 

श्रेष्ठको निधार र हातमा धारिलो हतियारले प्रहार गरेको चोटपटक देखिएको छ । विभिन्न भागहरूमा चोटपटक लागेको र घटनाको प्रकृति हेर्दा कुनै वस्तुले हिर्काएर हत्या गरेपछि शव खेतमा फ्याँकेको जस्तो देखिने प्रहरीले जनाएको छ । 

‘घटनाको प्रकृति हेर्दा हत्या गरेर फालेको देखिएको छ,’ घटनास्थलमा अनुसन्धान गर्न पुगेका मोरङ प्रहरी प्रमुख एसपी शान्तिराज कोइरालाले भने, ‘तालिमप्राप्त कुकुरसमेत ल्याएर हामीले सबै कोणबाट अनुसन्धान शुरु गरेका छौँ ।’ गहन अनुसन्धान गरेकोले थप विषय चाँडै खुल्ने उनले सुनाए ।

अविवाहित तुलसी भाइसँग कटहरी–२ आदर्श टोलमा बस्दै आएका थिए । उनीहरू ६ जना दाजुभाइ हुन् । मृतक तुलसी माइला हुन् ।

भाइ चित्रकुमारको श्रेष्ठको सिंघिया खोलापारि कोल्ड सेन्टर छ । उनले बिहीवार मात्र कटहरी–२ मा युवराज श्रेष्ठको कृषि फर्म ४ लाख रूपैयाँमा लिएका थिए । कृषि फर्म लिनका लागि उनले १० हजार रूपैयाँ बैना पनि दिइसकेका थिए ।

चित्रकुमारको कृषि फर्म नजिक कटहरी–१ का रमेश माझीको कृषि फर्म छ । त्यही कृषि फर्म रहेको फरकलाल माझीको जग्गामा तुलसीको शव भेटिएको हो ।

फरकलालले रमेशलाई जग्गा लिजमा दिएका हुन् । रमेशले दुई वर्षदेखि जग्गा लिजमा लिएर कृषि फर्म चलाउँदै आएका छन् । 

शव भेटिएको ५० मिटर उत्तर रमेशको कृषि फर्म नजिक रगत लतपतिएको बाँसको मुँग्रो पनि प्रहरीले फेला पारेको छ ।

घटनास्थल नजिक शव भेटिएको र रगत लतपतिएको मुँग्रो पनि माझीको कृषि फर्म अगाडि भेटिएपछि प्रहरीले अनुसन्धानका लागि तीन जनालाई नियन्त्रणमा लिएको छ । नियन्त्रणमा लिएकाहरू कृषि फर्ममा काम गर्नेहरू हुन् ।

‘घटनाको अनुसन्धान र सोधपुछको लागि लगिएको हो,’ अनुसन्धान खटिएका मोरङ प्रहरीका डीएसपी राजन कार्कीले भने, ‘प्रहरीले सबै कोणबाट अनुसन्धान शुरू गरेको छ ।’ 

थप विषय अनुसन्धानपछि मात्र खुल्ने उनले बताए । प्रहरीले शव पोस्टमार्टमका लागि विराटनगरको कोसी अस्पतालमा ल्याएको छ ।