पेट्रोलियम पदार्थको मूल्यवृद्धि घटाउन माग गर्दै प्रमुख प्रतिपक्षी दल नेकपा एमालेले दर्ता गराएको प्रस्तावमाथि प्रतिनिधि सभामा छलफल शुरू भएको छ ।

शुक्रवार बसेको प्रतिनिधि सभाको बैठकको शुरूमै एमाले प्रमुख सचेतक विशाल भट्टराईले प्रस्ताव पेश गर्दै सरकारको गैरजिम्मेवारीविरुद्ध संसदमा छलफल गराउनु परेको बताए । 

उपभोक्तासँग अतिरिक्त कर लिएर मूल्यवृद्धि गरिएकोमा कर घटाएर भए पनि मूल्य घटाउन जरुरी सार्वजनिक महत्त्वको प्रस्ताव ल्याउनु परेको भट्टराईले बताए । ‘स्थानीय तहको चुनाव भएको भोलिपल्टै सरकारले इन्धनको मूल्यवृद्धि गर्‍यो, जेठ ९ गते फेरि गरेपछि जेठ १० गते नै हामीले संसदमा प्रस्ताव दर्ता गरेका थियौं,’ भट्टराईले भने, ‘हिजो रातिबाट कर यथावत् राखेर मूल्य घटाइएको सुनियो । मूल्य घटाएपछि जवाफ दिन सजिलो हुन्छ भनेर यो प्रस्तावमाथि ढिलो गरिएको होला ।’

पूर्ववर्ती केपी ओलीले सरकार छाड्दाको दिन १०२ रूपैयाँ रहेको पेट्रोल देउवा सरकार बनेपछि १८० रूपैयाँसम्म पुगेको बताए । ‘गत असार २८ मा केपी ओली प्रधानमन्त्री रहँदा पेट्रोलको मूल्य १०२ रूपैयाँ थियो हिजो घटेपछि १७० पुगेको छ । डिजेलको मूल्य ८८ थियो १६३ पुगेको छ । १ हजार ४२५ रहेको ग्यासको मूल्य १८ सय हुन पुगेको छ,’ भट्टराईले भने, ‘बजारमा ८४ रुपैयाँ रहेको चिनीको मूल्य होलसेलमै ९९ पुगेको छ । तिहारसम्म चिनीको मूल्य १३० पुग्छ भन्ने आइरहेको छ ।’

प्रस्तावमाथिको छलफलपछि उद्योग वाणिज्य तथा आपूर्ति मन्त्री दीलेन्द्र बडूले जवाफ दिनेछन् ।