नेकपा (एमाले)का नेता एवम् पूर्वमन्त्री छविलाल विश्वकर्माले आगामी संघ र प्रदेशको निर्वाचनसम्म सत्तारुढ गठबन्धन टिक्ने अवस्थामा नरहेको दाबी गरेका छन् । 

सत्तारुढ गठबन्धनलाई टिकाइराख्न पुष्पकमल दाहाल र माधवकुमार नेपालले एमालेले आफूहरूलाई प्रधानमन्त्रीमा ‘अफर’ गरिरहेको हल्ला फैलाएको उनले बताए । 

१७ औं जातीय भेदभाव तथा छुवाछुत उन्मूलन राष्ट्रिय दिवसको अवसर पारेर शनिवार काठमाडौंमा आयोजित कार्यक्रममा बोल्दै उनले एमालेभित्र प्रधानमन्त्री कसैलाई बनाउने भन्ने विषयमा छलफल नै नभएको तर गठबन्धनमा आफ्नो प्रभाव विस्तार गर्न दाहाल र नेपालले सो हल्ला फिँजाएको बताएका हुन् । 

‘गठबन्धनमा आफ्नो हातमाथि पार्न प्रचण्ड–माधव नेपालले त्यस्तो हल्ला चलाइरहेका छन्,’ उनले भने, ‘त्यो होइन । हामी आफ्नै शक्ति र सामर्थ्य परिचालन गरेर आगामी निर्वाचनको तयारी गर्छौं ।’

नेता विश्वकर्माले पार्टीभित्र असन्तुष्ट नेता, कार्यकर्ताको मागलाई सम्बोधन गरेर आफूहरू संघ र प्रदेशको निर्वाचनको तयारीमा लाग्ने बताए ।