चलचित्र ‘झिँगेदाउ’को सम्पूर्ण छायाँकन सकिएको छ । बाँकी रहेको एक गीतको छायाँकनसँग बिहीवारदेखि चलचित्रको सम्पूर्ण छायाँकन सकिएको हो ।

चलचित्रको गीत बाहेकको छायाँकन भने कोरोना महामारी अगाडि नै सकिएको थियो । ‘झिँगेदाउ’लाई निर्देशक ज्ञानेन्द्र देउजाले निर्देशन गरेका हुन् । 

ललितपुरस्थित श्रीकाली चौरमा चलचित्रको बाँकी रहेको गीतको छायांकन गरिएको हो । बुधवार चलचित्रको इन्डक्ल्याप राखिएको थियो । तर, बर्षातका कारण चलचित्रको छायांकन बिहीबार अर्थात् आजमात्रै सकिएको हो । निर्देशक देउजाले चलचित्रको गीतमा मात्रै १५ लाख बढि खर्च भएको बताए ।

चलचित्रको कथाको डिमाण्ड अनुसार कुनैपनि कम्प्रमाइज नगरी गीतको छायांकन गर्दा उक्त खर्च लागेको उनले बताए । काम निकै राम्रो भएकाले बजेट बढ्दा पनि कुनै गुनासो नरहेको निर्देशक देउजाले सुनाए । केही दिनमा चलचित्रको गीत रिलिज गर्दै प्रचार आरम्भ गर्ने तयारी निर्माता तथा निर्देशक देउजाको छ । चलचित्र आगामी भदौ अन्तिम साता रिलिज हुनेछ ।

चलचित्रमा समावेश गीतको कोरियोग्राफी रामजी लामिछानेले गरेका हुन् । गीतमा चलचित्रका मुख्य कलाकार केकी अधिकारी, आँचल शर्मा, मुकुन भुषाल र कुशल बिष्टलाई फिचर्ड गरिएको छ । ‘ए माया तिमी विना जीवन चल्दैन’ बोलको गीतमा प्रविन बेडवाल र शान्ति श्री परियारको स्वर छ ।

कपनगडी सिनेमा र फिल्म क्रियु नेपालको ब्यानरमा निर्माण भएको चलचित्र भिमनिधि तिवारीको कथा ‘झिँगेदाउ’मा आधारित रहेको छ । प्रदीप भारद्वाजको पटकथा तथा सम्वाद लेखेको चलचित्रमा अर्जुन पोखरेलको संगीत, बिष्णु घिमिरेको छायांकन, मित्र डि गुरुङको सम्पादन छ । चलचित्रमा सुलभ, समिक्षा र सुशिल निर्माताको रुपमा रहेका छन् ।