आयोजक कोटेश्वर तेक्वान्दो डोजाङले काठमाडौं महानगर खुला तेक्वान्दो प्रतियोगिताको उपाधि जितेको छ ।

कोटेश्वर ५ स्वर्ण, २ रजत र ५ कास्य पदकका साथ टीम च्याम्पियन बन्न सफल भयो । 

पेप्सीकोलास्थित आयोजक कोटेश्वर डोजाङकै हलमा भएको प्रतियोगितामा दोस्रो भएको बाँकेले ४ स्वर्ण, २ रजत र २ कास्य पदक हात पार्‍यो । ४ स्वर्ण, १ रजत र ३ कास्य पदकका साथ चन्द्रागिरिले तेस्रो स्थानमा चित्त बुझायो ।

शीर्ष ३ स्थान स्थान हात पार्ने टोलीले क्रमशः ३० हजार, २० हजार र १० हजार पुरस्कार प्राप्त गरे ।

प्रतियोगिताको क्योरोगीतर्फ पुरुषमा चाँदनीका समीर तामाङ र महिलामा राष्ट्रिय विभूतिकी पुष्पा राखेल मगर उत्कृष्ट खेलाडी घोषित भए । पुम्सेको पुरुषमा बाग्लुङका लवसन विक र महिलामा स्युचाटारकी मोनिका मगर उत्कृष्ट खेलाडी चुनिए । उत्कृष्ट चारैले जनही ५ हजार रुपैयाँ पुरस्कार पाए ।

विजेतालाई काठमाडौं महानगरपालिका–३२ का अध्यक्ष नवराज पराजुली, प्रतियोगिता संयोजक एवं तेक्वान्दोका प्रमुख प्रशिक्षक नवीनकुमार श्रेष्ठ लगायतले एक कार्यक्रमबीच पुरस्कार प्रदान गरेका छन् ।

क्योरोगीमा २४ र पुम्सेमा ६ गरी ३० स्पर्धामा प्रतिस्पर्धा भएको थियो । आयोजकका अनुसार २२ जिल्लाका ६०० खेलाडी सहभागी थिए ।