‘२ नम्बरी’को फस्टलुकमा यस्ता देखिए दयाहाङ र सौगात

तिहारमा प्रदर्शनमा आउने चलचित्र ‘२ नम्बरी’को फस्टलुक सार्वजनिक गरिएको छ । सोमवार अभिनेता दयाहाङ राई र सौगात मल्ल स्टारर चलचित्रको दुई पोष्टर सार्वजनिक गरिएको हो । 

दीपेन्द्र लामाको लेखन तथा निर्देशनमा तयार ‘२ नम्बरी’को पोष्टरमा दयाहाङ र सौगातलाई फरक गेटअपमा प्रस्तुत गरिएको छ ।

एउटा पोष्टरमा यी दुई अभिनेता मात्र प्रस्तुत छन् भने अर्को पोष्टरमा दयाहाङ र सौगातका अलावा बुद्धि तामाङ र अभिनेत्रीद्वय उपासना सिंह ठकुरी र उगेन छोदेनलाई प्रस्तुत गरिएको छ । 

रेड बर्ड प्रोडक्शनको प्रस्तुतिमा तयार भएको ‘२ नम्बरी’ दुई साथीको मित्रताको कथामा बनेको चलचित्र हो । किरण नेपाली प्रस्तुतकर्ता रहेको चलचित्रमा दीपक मनाङ्गे, अमलादेवी राई र जयस श्रेष्ठको लगानी छ । सरोज नेपाली कार्यकारी निर्माता रहेको चलचित्रको सह–निर्मातामा मिठु तामाङ्नी रहेकी छन् ।

सुशान्त प्रजापतिको छायांकन रहेको चलचित्रमा रामजी लामिछानेको कोरियोग्राफी, जयन जे वाइवाको संगीत, निमेष श्रेष्ठको सम्पादन छ । ‘आगामी तिहारलाई अझ रमाइलो बनाउन हामी दर्शकसमक्ष चलचित्र ‘दुई नम्बरी’ लिएर आउँदैछौं,’ पोष्टर सार्वजनिक गर्दै निर्देशक लामा लेख्छन्, ‘अहिले नै याद राख्नुस् है, कात्तिक ४ मा हाम्रो भेट हुनेछ ।’

दीपकराज गिरी र दीपाश्री निरौलाको चलचित्र ‘छ माया छपक्कै’पछि निर्देशक लामाले ‘२ नम्बरी’को लेखन एवं निर्देशन गरेका हुन् ।