गैर सरकारी संस्थाको प्रायोजनमा प्रतिनिधि सभाको अर्थ समितिका सदस्यहरू बेलायत भ्रमणमा गएका छन् ।

संसद् सचिवालयले खर्च व्यहोर्न नसक्ने भनेपछि गैरसरकारी संस्थाको प्रायोजनमा उनीहरू बेलायत भ्रमणमा गएको स्रोतले बतायो । 

बेलायतको संसदीय ट्रेजरी कमिटीको अवलोकन गर्न भन्दै अर्थ समितिको जम्बो टोली बेलायत गएको हो ।

अर्थ समितिका सभापति कृष्णप्रसाद दाहालसहितको टोलीमा पूर्व अर्थमन्त्री सुरेन्द्र पाण्डे, कांग्रेस नेता एवं सांसद डा. मीनेन्द्र रिजाललगायत छन् । 

अर्थ समितिका सदस्य एमाले सांसद पदम गिरी, नेपाली कांग्रेसकी प्रमिला राई र समिति सचिव सुरेन्द्र अर्याल पनि टोलीमा छन् । 

टोलीमा माओवादीका श्याम श्रेष्ठ, जसपाका रामबाबुकुमार यादवलगायत समेटिएका छन् ।

१० जना सांसद बेलायत भ्रमणमा जाने निर्णय भएकोमा नेकपा एसका मेटमणि चौधरी र निरादेवी जैरुले भ्रमण स्थगित गरेका थिए ।

असार ४ देखि १५ सम्म १२ दिनको कार्यक्रमका लागि उनीहरू बेलायत भ्रमणमा गएको सचिवालयका एक अधिकारीले बताए ।

समितिले बेलायत भ्रमणका लागि सचिवालयसँग प्रस्ताव गरेपनि राज्यकोषबाट जान सम्भव नभएपछि गैरसरकारी संस्थाको स्रोतबाट बेलायत भ्रमणमा गएको सचिवालयका एक अधिकारीले बताए । 

कोरोना संकट शुरू भएपछि सरकारले राज्यकोषबाट खर्च हुने वैदेशिक भ्रमण कटौती गरेको थियो ।

जनार्दन शर्मा अर्थमन्त्री बनेर आएपछि आर्थिक पारदर्शिताको नीतिअनुसार भ्रमण खर्च कटौती गर्ने नीति लिएका छन् ।

‘सांसदहरूको बेलायत भ्रमणका लागि सचिवालयले कुनै खर्च व्यहोरेको छैन, सचिवालयका तर्फबाट नभई गैरसरकारी संस्थाको व्यवस्थापनमा गएकाले भ्रमण भत्ता पनि दिने कुरा भएन,’ सचिवालयका एक अधिकारीले भने । 

गैरसरकारी संस्था एनडीआईको प्रायोजनमा गएको संसदीय टोलीलाई लण्डनस्थित बेलायती दूतावासले बिहीवार रात्रिभोजको आयोजना गरेको थियो ।

सभामुखको भ्रमणका लागि अर्थसँग बजेट माग

सचिवालयले सभामुख अग्नि सापकोटाको भ्रमणको लागि भने अर्थ मन्त्रालयसँग बजेट माग गरेको छ । 

अन्तरपार्लियामेन्ट्री युनियनको कार्यक्रममा सहभागी हुन सभामुख सापकोटा जुलाई २३ देखि अजरबैजान जाने तयारीमा छन् ।

नेपाली कांग्रेस र नेकपा एमालेका एक–एक सांसद र एक कर्मचारीसहित ४ जनाका लागि खर्च माग गरिएको स्रोतले बतायो ।

उनीहरूका लागि हवाई टिकट, खाना र भ्रमण भत्ताको लागि बजेट माग गरिएको स्रोतले बतायो ।