अस्ट्रेलियामा विगत एक दशकमा क्रिस्चियनहरूको संख्या घटेको पछिल्लो जनगणनाले देखाएको छ । 

द सिड्नी मर्निङ हेराल्ड पत्रिकामा छापिएको खबरअनुसार, आफूलाई क्रिस्चियन भनेर चिनाउने व्यक्तिहरूको संख्या इतिहासमै पहिलोपटक ५० प्रतिशतभन्दा कम छ । 

आफूलाई कुनै पनि धर्म नमान्ने व्यक्तिका रूपमा वर्णन गर्ने मानिसको संख्या ह्वात्तै बढेको छ । 

सन् २०२१ को जनगणनाको आँकडाको पहिलो जत्था मंगलवार अस्ट्रेलियाको तथ्यांक विभागले सार्वजनिक गरेको छ । त्यसमा जम्मा ४४ प्रतिशतले आफूलाई क्रिस्चियन भनी चिनाएका छन् जबकि सन् २०११ मा त्यो ६१ प्रतिशत थियो । 

सन् १९११ मा पहिलोपटक जनगणना गर्दा ९६ प्रतिशत अस्ट्रेलियालीहरूले क्रिस्चियानिटीलाई आफ्नो धर्म बताएका थिए । 

तर अहिले आएर ३९ प्रतिशत अस्ट्रेलियालीहरूले आफूलाई कुनै पनि धर्ममा नरहेको भनी चिनाउने गरेका छन् । 

क्रिस्चियनहरूको संख्या घटिरहँदा आफूलाई हिन्दू भनी चिनाउने मानिसहरूको संख्या विगत पाँच वर्षमा ५५ प्रतिशतले बढेको छ । नेपाल र भारत जस्ता मुलुकहरूबाट आएका आप्रवासीहरूको संख्या बढेकाले यसो भएको हो । 

अस्ट्रेलियामा लगभग ६ लाख ८४ हजार मानिस अर्थात् जनसंख्याको २.७ प्रतिशतले आफूलाई हिन्दू भनी चिनाउने गरेका छन् ।