नेपाली कांग्रेसको जारी केन्द्रीय कार्यसमिति बैठकमा नेता डा. शेखर कोइरालाले गम्भीर प्रश्न उठाएका छन् ।

सोमवारको बैठकमा नेता कोइरालाले पार्टी सभापति तथा प्रधानमन्त्री शेरबहादुर देउवालाई सरकार र पार्टी सञ्चालन सम्बन्धी प्रश्न गरेका छन् ।

तत्कालीन प्रधानमन्त्री केपी शर्मा ओली नेतृत्वको सरकारले गरेका गलत कामहरू सच्याउने काम वर्तमान सरकारले नगरेकोमा असन्तुष्टि व्यक्त गरिएको छ ।

उनले बैठकमा पेश गरेको बुँदागत विवरणमा लेखेका छन्, ‘गठबन्धन दलको साझा कार्यक्रममा पनि विगत सरकारले गरेको अलोकतान्त्रिक गतिविधि सच्याउन भन्यौं तर वर्तमान सरकार बनेको पनि झण्डै १ वर्ष पुगिसक्यो तर यस्ता विषयहरू प्राथमिकतामा किन परेनन् ? भ्रष्टाचारका काण्डहरूको छानबिन किन ओझेलमा पर्‍यो ?’ सरकार नेतृत्वको हिसाबले पार्टी जवाफदेही बन्न सकेन भने आगामी निर्वाचनलाई समेत प्रभाव पार्ने ध्यानाकर्षण गर्न चाहन्छु ।’

जनताको दैनिक जीवन दिनानुदिन कष्टकर बन्दै गएको, महंगीले जनताको ढाड सेकिएको, बेरोजगारी दिनानुदिन बढ्दै गएको विषयमा पार्टी गम्भीर हुन नसकेकोमा कोइरालाले असन्तुष्टि जनाएका छन् ।