नेकपा एमालेका सांसद कृष्णभक्त पोखरेलले संसदमा बोलेको विषयलाई लिएर पूर्व मन्त्री एवं नेकपा एसका सांसद विरोध खतिवडाले नियमापत्ति गरेका छन् ।

बिहीवार नागरिकता पहिलो संशोधन विधेयक २०७९ माथिको सैद्धान्तिक छलफलका क्रममा सांसद पोखरेलले बुवाको पहिचान नखुलेका बेवारिसे बालबालिकाको बुवा सुरक्षाकर्मी हुनसक्ने टिप्पणी गरेका थिए ।

‘भर्खरै बोल्ने माननीयले अत्यन्त आपत्तिजनक ढंगले २ वटा शव्द बोल्नुभयो, जुँगा भएका सैनिक र प्रहरीले आफूले जन्माएका सन्तानलाई नाम दिन नचाहने, भाग्ने लुक्ने भनेर जुन उच्चारण गर्नुभयो,’ खतिवडाले भने, ‘शान्ति सुरक्षामा खटिएका प्रहरीहरू र राष्ट्रिय सुरक्षामा खटिएका सेनाप्रति लक्षित गरेर, लक्षित गरेर मात्र होइन नामै लिएर । यसले हाम्रो सामाजिक सद्भाव बिथोल्ने र अत्यन्त आपत्तिजनक हो । यो शब्द दूरगामी र घातक भएकाले यसलाई रेकर्डबाट हटाउन माग गर्छु ।’

खतिवडाको माग अनुसार सभामुख अग्निप्रसाद सापकोटाले ती शब्द हटाउने/नहटाउने विचार गरेर निर्णय लिइने बताए । विरोध खतिवडालाई संसदमा सर्वाधिक धेरै नियमापत्ति गर्ने सांसदको रूपमा चिन्ने गरिन्छ । 

त्यसअघि छलफलको क्रममा संसदको कानून, न्याय तथा मानव अधिकार समितिका सभापति समेत रहेका पोखरेलले त्यस्ता बेवारिसे बालबालिकाका बुवा सुरक्षाकर्मी हुनसक्ने बताएका थिए । 

‘... जहाँ बुवा निश्चित छैन वा बुवा चिनिएको त हो, नेपाल आर्मी या सुरक्षा निकायमा काम गथ्र्यो, जुंगे–जुंगे मानिस हो, अहिले ऊ आफ्नो परिचय दिन चाहन्न । नागरिकता बनाइदिन चाहँदैन । ऊ भागी भागी हिँड्छ भने एउटी आमा आफ्नो सन्तानलाई ढुक्कसँग नागरिकता दिन सक्छिन् ?’ पोखरेलले भने । 

पोखरेलले केपी ओली सरकारको पालामा ल्याइएको विधेयक प्रगतिशील रहेको दाबी गरे ।