१ नम्बर प्रदेशको नामकरणको विषयलाई लिएर दलहरू विभाजित भएका छन् ।

सहमतिकै आधारमा १ नम्बर प्रदेशको नामकरण गर्ने भनेर एउटै विन्दुमा उभिन खोेजेका दलका नेताहरू यतिबेला आरोप–प्रत्यारोपमा उत्रिएका छन् ।

नेकपा एमाले मुख्यमन्त्री राजेन्द्रकुमार राईलाई दोषी देखाएर उम्कने प्रयासमा देखिएको छ भने सत्तारुढ दलभित्र पनि नामको विषयमा एकमत छैन । 

मुख्यमन्त्री राईले आन्दोलनलाई उचालेको र हिंसा भड्काउन खोजेको भन्दै प्रदेश सभाको बैठकमा विपक्षी दलका सांसदले आपत्ति जनाएका छन् । अहिले विभिन्न जातीय संघसंस्थाले किरात लिम्बुवान लगायतका नाम राख्न दबाब स्वरूप विभिन्न आन्दोलन गरिरहेका छन् । मुख्यमन्त्री राईले आन्दोलन गर्न लगाएको एमालेको आरोप छ । 

सोमवारको प्रदेश सभामा बोल्ने नेकपा एमालेका प्रदेश सांसदहरूले मुख्यमन्त्रीको विरोध गरेका छन् । प्रदेश सभाको शून्य समयमा एमाले सांसद बिनादेवी राईले मुख्यमन्त्रीले जनतालाई उचाल्ने काम गरेको र हिंसा भड्काउन खोजेको आरोप लगाइन् ।

एमालेका सांसद लीलाबल्लभ अधिकारीले केही समययता आएको मुख्यमन्त्रीको अभिव्यक्तिले मुलुककै ध्यान खिचेको बताए ।
  
यता, प्रदेशकै मन्त्रीहरूले मुख्यमन्त्रीको अभिव्यक्ति सदियौंदेखि उत्पीडनमा रहेका समुदाय र भूइँ मान्छेहरूको आवाज भएको बताउने गरेका छन् । १ नम्बर प्रदेशका आर्थिक मामिला तथा योजना मन्त्री इन्द्रबहादुर आङ्बोले इतिहास, सभ्यता र उत्पीडित समुदायको पहिचानका पक्षमा वकालत गर्दा भड्काउ देख्नेहरू मूलतः जातिवादी र साम्प्रदायिक भएको आरोप लगाएका छन् ।

सामाजिक सञ्जालमा स्ट्याटस लेख्दै मन्त्री आङ्बोले जातीय वकालत गर्नेले बिखण्डन निम्त्याइरहेको आरोप लगाएका छन् । नाम राख्न चौतर्फी विरोध भइरहेका बेला सत्तारुढ र प्रमुख प्रतिपक्षी दलबीच जुहारी नै चल्न थालेको छ ।