अखिल नेपाल किसान महासंघले मिटरब्याजीहरूलाई कारबाही गर्न माग गरेको छ । पछिल्लो १३ दिनयता माइतिघर मण्डलामा धर्ना बसिरहेका नवलपरासी जिल्लाका मिटरब्याजबाट पीडितहरूको आन्दोलनप्रति ऐक्यबद्धता जनाउँदै महासंघले मिटरब्याजको माध्यमबाट गरीब, किसानलाई शोषण गर्नेहरूलाई कानूनी कारबाहीको दायरामा ल्याउन माग गरेको हो । 

अध्यक्ष प्रेम दंगालले शुक्रवार विज्ञप्ति जारी गर्दै ‘वित्तीय प्रणालीमा पहुँच नभएका ग्रामीण क्षेत्रका गरिब किसानहरूको बाध्यताको फाइदा उठाई मिटरब्याजीहरूले किसानहरूको जग्गा–जमिन कब्जा गर्ने, जीवनभर ऋणमुक्त हुन नसक्ने गरी अत्याधिक रकम असुल्ने गरेको’ उल्लेख छ । 

महासंघले यस विषयमा बारम्बार आवाज उठाइरहँदा पनि सरकारले समाधानका लागि कुनै पहलकदमी नलिएको आरोप लगाउँदै सरकार दलालको संरक्षणमा लागिरहेको आशंका गरेको छ । विज्ञप्तिमा मिटरब्याजजस्ता ठगीधन्दाबाट किसानहरूलाई शोषण गर्ने गिरोहलाई कडाभन्दा कडा कारबाही गर्न र पीडित किसानका मागलाई यथोचित सम्बोधन गर्न माग गरिएको छ ।