नेकपा एमालेका अध्यक्ष केपी शर्मा ओलीले भारतले निमन्त्रणा नदिएकोमा नेकपा एकीकृत समाजवादीका अध्यक्ष माधवकुमार नेपाललाई छटपटी भएको टिप्पणी गरेका छन् । उनले गठबन्धनका नेताहरू भारतीय हस्तक्षेपसामु चुपचाप बसेको आरोप लगाए । 

विभिन्न राजनीतिक दलका नेता कार्यकर्तालाई सोमवार पार्टी प्रवेश गराउँदै अध्यक्ष ओलीले भारत भ्रमणमा गएको बेलामा गठबन्धनका नेताले नेपाली भूमि फिर्ताबारे चुइक्क नबोलेको आरोप लगाए । ‘गठबन्धनको हेर्नुस त म्याउँ–म्याउँ, लिम्पियाधुरा–कालापनी भन्न सक्छन् ? सम्माननीय प्रधानमन्त्री शेरबहादुर देउवाजी तपाईंको पश्चिमको नक्सा, तपाईंको प्रदेशको नक्सा । लिम्पियाधुरा नेपालको हो कि होइन ? बोल्नु हुन्न उहाँ’, ओलीले भने, ‘महान क्रान्तिकारी, अनेक तमासा गर्ने प्रचण्डजी अस्ति दिल्ली जाँदा किन चुइक्क बोल्नु भएन ? बोल्नुस् । माधव नेपाल भन्ने अर्को हुनुहुन्छ, उहाँ बोल्नुस्, कसको हो, लिम्पियाधुरा ?’ 

भारतले निम्तो नदिएकोमा माधव नेपाललाई छटपटी भएको ओलीले टिप्पणी गरे । ‘शेरबहादुर र प्रचण्डलाई बोलाए, मलाई बोलाएनन् भनेर छटपट भएर बस्नु भएको छ । बोल्न पर्दैन आफ्नो देशको बारेमा ?’ ओलीले भने ।