नेकपा एमालेका पोलिटब्यूरो सदस्य सूर्य थापाले आउँदो मंसिरको निर्वाचनमा प्युठानमा गठबन्धनले काम नगर्ने दाबी गरेका छन् । उनले गठबन्धन दलको सेन्टर भत्किएको भन्दै प्युठानको निर्वाचन एमालेले जित्ने दाबी गरेका छन् । 

बुधवार बुटवलमा सञ्चारकर्मीसँग कुराकानी गर्दै नेता थापाले भने, ‘स्थानीय निर्वाचनको मत परिणामलाई हेर्दा गठबन्धन दलको मतभन्दा हामी ९ हजार मतले पछाडि हो । त्यसपछि ५ हजारभन्दा बढी जनमोर्चा, माओवादी र कांग्रेसका नेता/कार्यकता एमालेमा प्रवेश गरेका छन् । आउँदो निर्वाचनसम्म एमालेको मत गठबन्धन भन्दा बढी हुँदै निर्वाचन जित्नेछ ।’ 

स्थानीय तहको मत परिणाम गठबन्धनको ४८ हजार १७१ र एमालेको ३९ हजार १२८ रहेको थापाले डाटासमेत प्रस्तुत गरे । ‘मोहनविक्रम सिंहको पुर्ख्यौली सेन्टर भत्किएको छ । सबैभन्दा बढी पार्टी छाडेर एमालेमा आउने क्रम राष्ट्रिय जनमोर्चाबाट छ । जनमोर्चाका नेता अर्जुन विक, मोहन रोका, माओवादीका हिमाल पौडेल, मोहनविक्रम सिंहकी बैनी अजिता सिंहसमेतका नेताहरु एमालेमा आइसकेका छन्’, उनले भने, ‘चुनाव एमालेले जित्छ ।’

पूर्वप्रधानमन्त्री केपी शर्मा ओलीका प्रेस सल्लाहकारसमेत रहेका थापाले सर्वसम्मतिमै प्युठानमा एमालेले उम्मेदवार टुंगो लगाउने दाबी गरेका छन् । प्युठानमा निर्वाचनका लागि आफूले पाँच फन्को मारेको भन्दै पार्टीमा गुणात्मक सुधार आएको उनको भनाइ छ । 

प्युठानबाट आउँदो निर्वाचनमा एमालेबाट सूर्य थापा, मणिचन्द्र थापा र हरि रिजाल प्रतिनिधिसभाका लागि आकांक्षी रहेका छन् ।