विभिन्न ब्राण्डको लोगो राखी चामल बिक्री गर्ने दुई जना राजधानीबाट पक्राउ परेका छन् । अनुमति बिना “सेन्चुरी फुड प्याकेजिङ एण्ड प्रोसेसिङ” ले विभिन्न ब्राण्डको लोगो राखी चामल बिक्री वितरण गर्ने गरेको सूचनाका आधारमा प्रहरीले छापा मार्दा ललितपुरको सुन्दरीघाट  उद्योगका सञ्चालक र मेनेजर पक्राउ परेका हुन् । 

सञ्चालक एस अग्रावालले मेनेजर लाल बहादुर बस्नेतको सहयोगमा  आयातित चामलमा थकाली लङ्ग ग्रेन, मुवारक लङ्ग ग्रेन, जन्नत, जन्नत जिरा, सुवास, साँचो सोनम, घैला, कोहिनुर, जिवा, साँचो क्लासिक, मुवारक क्याटरिना जिरा, साँचो लङ्ग ग्रेन, स्पेशल अनेष्टी, सुवाश उसिना लङ्ग ग्रेन, थकाली क्याटरिना, थकाली शाही वासमती, थकाली सोनम, थकाली उसिना, घैला सोना राईस लगायतका लोगो राखी बेच्ने गरेको खुलेको उपत्यका अपराध अनुसन्धान कार्यालयले जनाएको छ । 

 अनुज्ञापत्र अनुमति नलिई विभिन्न ब्राण्डका चलाउने उद्योगबाट एक लाख असी हजार तीस किलो चामल तथा प्याकेजिङका लागि राखिएका विभिन्न ब्राण्डका खाली ब्याग, प्याकेजिङ मेसिन एवं बिग्रिएको अवस्थामा रहेको ४७,४६० किलो चामल बरामद भएको अपराध अनुसन्धान कार्यालयले जनाएको छ ।