नेकपा एकीकृत समाजवादीका अध्यक्ष माधवकुमार नेपालले नेकपा बहुमतका अध्यक्ष धर्मेन्द्र बास्तोलालाई अहिले नै राष्ट्रपतिको निम्ति आकांक्षा नराख्न सुझाव दिएका छन् । काठमाडौंमा आइतवार आयोजित एक कार्यक्रममा बास्तोलाले आफू राष्ट्रपति पदको आकांक्षी भएको बताएपछि नेता नेपालले त्यस्तो आकांक्षा नराख्न सुझाव दिएका हुन् ।

उनले बास्तोलालाई मंसिर ४ को निर्वाचन जितेर देखाउन पनि चुनौती दिएका छन् । पहिलो एउटा क्षेत्रबाट निर्वाचन जितेपछि मात्र राष्ट्रपति बन्ने सपना देख्नु उपयुक्त हुने नेपालको सुझाव थियो । चुनाव जित्न नसक्ने अनि राष्ट्रपतिको उम्मेदवार आफू हो भन्न बास्तोलाले नमिल्ने उनको भनाइ थियो ।

‘समाजवादको नेपाली मार्गचित्र’ विषयक विचार गोष्ठीमा बोल्दै नेता नेपालले भने, धर्मेन्द्रजीले राष्ट्रपतिको उम्मेदवार घोषणा गर्नु भयो । एउटा निर्वाचन क्षेत्रमा त जितेर देखाउनु प¥यो । एउटा निर्वाचन क्षेत्रमा तपाईं जित्न सक्नु हुुन्न, एउटा जिल्लामा तपाईं जित्न सक्नुहुन्न भने अनि अहिले नै राष्ट्रपतिको निम्ति आकांक्षा नराख्नुस् ।’

अध्यक्ष नेपालले मुलुकमा संघीय लोकतान्त्रिक गणतन्त्र स्थापना गर्ने कामको नेतृत्व आफूले गरेको दाबी गरेका छन् । पूर्वप्रधानमन्त्री समेत रहेका नेपालले आफू नेतृत्वको तत्कालीन एमालेले गणतन्त्रमा जाने निर्णय गरेर सो आन्दोलनको नेतृत्वदायी भूमिका निर्वाह गरेको बताए । गणतन्त्रको पक्षमा कांग्रेस नरहेको, माओवादीभित्र पनि सांस्कृतिक राजाको कुरा भइरहेका बेला आफू नेतृत्वको तत्कालीन एमालेको केन्द्रीय कमिटी बैठकले गणतन्त्रमा जाने निर्णय गरेर आन्दोलनलाई अघि बढाएको उनको दाबी छ । 

‘यहाँ गणतन्त्र ल्याउनका लागि विभिन्न पार्टीमा बहस भएको थियो । कांग्रेस गणतन्त्रको पक्षमा आएको थिएन । माओवादी पार्टी गणतन्त्रवादी भएता पनि त्यहाँभित्र पनि कहिले सांस्कृतिक राजाको कुरा हुने गर्दथ्र्यो । हाम्रो पार्टीभित्र पनि विवाद भयो । २०६२ सालको असार र साउन महिनामा बसेको तत्कालीन एमालेको केन्द्रिय कमिटी बैठकले गणतन्त्रमा जाने निर्णय ग¥यो’, उनले भने, ‘हामीले नै गणतन्त्र ल्याउनका लागि बुटवलबाट आन्दोलनको नेतृत्वका गरेका थियौँ’, उनले भने ।