जनता समाजवादी पार्टी (जसपा) नेपालका राष्ट्रिय अध्यक्ष उपेन्द्र यादवले आगामी प्रतिनिधिसभा र प्रदेशसभाको निर्वाचनमा गठबन्धनलाई निरन्तरता दिनुपर्ने आजको आवश्यकता भएको बताएका छन् ।

पर्साको वीरगञ्जमा बुधवार जसपाको अगुवा कार्यकर्ता भेलालाई सम्बोधन गर्दै अध्यक्ष यादवले साझेदार गठबन्धनबाट जसपालाई उचित स्थानसमेत दिनुपर्ने बताए ।

जसपाको हैसियतअनुसार सिट बाँडफाँट नगरिए जसपा एक्लै चुनाव लड्ने उद्घोष गर्दै त्यही अनुसारको तयारीमा लाग्न नेता कार्यकर्तालाई यादवले निर्देशन समेत दिए ।

संघीयता र गणतन्त्रको जननी मधेशी दल रहेको दाबी गर्दै यादवले मधेश र मधेशवासीको पहल कदमीका कारण मुलुकमा संघीयता र गणतन्त्र आएको बताए ।

त्यसैले संघीयता, गणतन्त्र लगायतका प्राप्त राजनीतिक उपलब्धिको रक्षा गर्ने मुख्य अभिभारा जसपाकै भएको उल्लेख गरेका छन् ।