नेकपा एमाले र लोकतान्त्रिक समाजवादी पार्टी (लोसपा)बीच चुनावी गठबन्धनको मौखिक सहमति भएको छ ।

मंसिर ४ गते हुने प्रतिनिधिसभा र प्रदेशसभाको चुनावका लागि एमाले र लोसपाबीच गठबन्धन हुन लागेको हो।

दुवै पार्टीका नेताहरूबीच पटक–पटक भएको भेटवार्ता तथा अनौपचारिक संवादमा गठबन्धन गर्ने सहमति भएको हो ।

स्रोतका अनुसार बिहीवार एमाले अध्यक्ष केपी शर्मा ओली र लोसपा अध्यक्ष महन्थ ठाकुरबीच भएको भेटवार्तामा पनि त्यस विषयमा सहमति भएको छ ।

नेपाली कांग्रेसले गठबन्धनका लागि लोसपालाई प्रस्ताव गरेपनि ठोस जवाफ नदिएपछि लोसपाले एमालेसँग गठबन्धन गर्न लागेको हो।

पछिल्लो २ महिनादेखि प्रधानमन्त्री देउवाले गठबन्धनमा आउनका लागि लोसपालाई बोलाएर पनि ठोस जवाफ नदिएपछि एमालेसँग गठबन्धन गर्न लागेको लोसपाका एक नेताले बताए।

ठाकुर-ओली भेट हुनुभन्दा अघि र पछि पनि एमाले संसदीय दलका उपनेता समेत रहेका उपाध्यक्ष सुवास नेम्वाङ तथा नेता गोकुल बास्कोटा र लोसपा अध्यक्ष ठाकुर तथा वरिष्ठ नेता राजेन्द्र महतोबीच पटक–पटक भेटवार्ता भएको स्रोतको दाबी छ। 

‘हामीले कुराकानी गरेर अध्यक्ष कमरेड (केपी शर्मा ओली)सँग भेटघाटको समय मिलाइदिएका हौं,’ लोसपासँगको वार्तामा सहभागी एक नेताले शुक्रवार लोकान्तरसँग भने, ‘हिजो (बिहीवार)साँझ भेटवार्ता भएको हो । ठोस के कुरा भयो भन्नेमा म अपडेट छैन ।’

एमाले नेताहरूसँगको भेटमा लोसपाले नागरिकता विधेयक प्रमाणीकरणका लागि पहल गरिदिन आग्रह गरेको थियो ।

दुई पार्टीका नेताबीच पटक–पटक भेटवार्ता भएर गठबन्धन गर्ने अनौपचारिक सहमति भएको लोसपाका वरिष्ठ नेता राजेन्द्र महतोले लोकान्तरसँग बताएका छन् ।

'दुई पार्टीका नेताहरूबीच पटक–पटक अनौपचारिक भेटवार्तापछि गठबन्धन गर्नका लागि औपचारिक कार्यदल नै गठन गर्ने कुरामा एक किसिमको समझदारी भएको हो,' महतोले लोकान्तरसँग भने।

मधेश प्रदेशका ३२ सीटमध्ये साविक राष्ट्रिय जनता पार्टी(राजपा ) नेपाल र साविक समाजवादी पार्टी (सपा)ले जितेका सीटमा लोसपाको दाबी छ ।

राजपाले जितेको १० सीट र सपाले जितेको ९ सीट गरी कुल १९ सीटमा लोसपाले दाबी गरेको छ। 'त्यो १९ सीटमध्ये लोसपाले जित्ने सीटमा लोसपाको स्वाभाविक दाबी हुन्छ,' महतोले थपे, '१९ वटै सीटमा लोसपाले जित्न सक्ने परिस्थिति नभए त्यसमध्ये  केही सीट छाड्न सकिन्छ ।'

अघिल्लोपटक वाम गठबन्धनले जितेका क्षेत्र भने एमालेले नै राख्ने छ ।

'मधेश प्रदेशबाहेक तराईका अन्य जिल्लामा पनि एमाले र लोसपाबीच गठबन्धन हुन्छ,' महतोले थपे, 'एकआपसमा तालमेल गरेर सीट बाँडफाँट हुन्छ ।'