नेपाल कम्युनिष्ट पार्टी(माओवादी केन्द्र) कास्कीले आसन्न प्रतिनिधिसभा तथा प्रदेशसभा निर्वाचनका लागि पार्टीका तर्फबाट उम्मेदवार सिफारिस गरेको छ । माओवादीले मङ्सिर ४ गतेको निर्वाचनका लागि शहीद परिवारसमेत रहेकी पोखरा–५ निवासी अनिता भुर्तेललाई प्रतिनिधिसभाको समानुपातिकतर्फ उम्मेदवार सिफारिस गरेको छ । तत्कालीन नेकपा (माओवादी) कास्कीका जिल्ला सहइञ्चार्ज रहेका अनिताका बुबा राजविक्रम र आमा सीता भुर्तेललाई विसं २०६१ वैशाख ३१ गते पोखरा–२४ पामेबाट नियन्त्रणमा लिएर सेनाबाट हत्या भएको थियो ।

राजविक्रम पार्टीका जिल्ला नेता रहे पनि आमा पार्टी समर्थक र गृहेणी थिइन् । सानै उमेरमा सशस्त्र युद्धमा बुबा÷आमा गुमाएपछि अनिताले सङ्घर्ष गर्दै आफू पढ्दै र बहिनीहरु र भाइको सम्पूर्ण जिम्मेवारी सम्हाल्दै आएकी थिइन् । 
अनिताम हालै पोखरामा भएको माओवादी केन्द्र निकट अखिल नेपाल प्रगतिशील जनस्वास्थ्यकर्मी महासङ्घको प्रथम राष्ट्रिय महाधिवेशनबाट केन्द्रीय सदस्यमा चयन भएकी थिइन् । पार्टीले उम्मेदवार सिफारिस गरेर पठाएपछि उनले खुसी व्यक्त गरिन् ।