अग्निपथ योजना अहिलेलाई होल्ड, निर्णय गर्न निर्वाचित सरकारलाई जिम्मा

भारतको सैन्य भर्ती योजना अग्निपथबारे वर्तमान सरकारले कुनै निर्णय नगर्ने भएको छ । बिहीवार परराष्ट्र मन्त्रालयले आयोजना गरेको पत्रकार सम्मेलनमा सहसचिव सेवा लम्सालले अग्निपथबारे अहिले कुनै निर्णय नहुने जानकारी दिएकी हुन् । 

आगामी निर्वाचनपछि बन्ने सरकारले नै अग्निपथ भर्नाबारे निर्णय गर्ने उनले बताइन् ।  

सन् १९४७ मा नेपाल, भारत र बेलायतबीच भएको त्रिपक्षीय सम्झौतापछि भारतीय सेनामा नेपाली भर्ती शुरू भएको थियो । अहिले भारतीय सेनाको ७ वटा गोर्खा राइफल्स रेजिमेन्टमा गरी करिब ३० हजार नेपाली सेवारत छन् । 

प्रवक्ता लम्सालले तत्काललाई अग्निपथसम्बन्धी विषयलाई थाँती राखिएको बताइन् । ‘अग्निपथको बारेमा सरकारले कुराकानी गर्ने गरेर तत्काललाई होल्डमा राखेको अवस्था हो । नयाँ निर्वाचित सरकारले यस विषयमा के गर्ने, कसरी अघि बढ्ने भन्नेबारेमा निर्णय लिन सक्छ’, लम्सालले भनिन् ।