निर्वाचन आयोगले राजनीतिक दलहरूले २०७४ सालमा समानुपातिक निर्वाचनतर्फ बुझाएको उम्मेदवारको बन्द सूची खारेज गरेको छ । आयोगले ५ वर्षअघि दलहरूले बुझाएको उम्मेदवारको बन्दसूची भोलि (असोज १ गते) राति १२ बजेदेखि कायम नरहने जनाएको छ । 

राष्ट्रिय सभा, राष्ट्रिय सरोकार तथा समन्वय समिति र राजनीतिक दलको सुझाव समेतका आधारमा बन्द सूची कायम नरहने निर्णय गरिएको आयोगले जानकारी दिएको छ । आयोगका प्रवक्ता शालिग्राम शर्मा पौडेलले शुक्रवार जारी गरेको विज्ञप्तिमा ‘२०७४ सालमा भएको प्रतिनिधि सभा सदस्य तथा प्रदेश सभा सदस्य निर्वाचनको लागि राजनीतिक दलले पेश गरी निर्वाचन आयोगले प्रकाशन गरेको उम्मेदवारको बन्दसूची मिति २०७९।०६।०१ गते राति १२ः०० बजेदेखि स्वतः कायम नरहने गरी आयोगले निर्णय गरेको’ उल्लेख गरिएको छ । 

आयोगले गरेको उक्त निर्णयको जानकारी प्रतिनिधि सभा, प्रदेश सभा, संघीय संसद राष्ट्रिय सभाको राष्ट्रिय सरोकार तथा समन्वय समिति र राजनितिक दलहरूलाई दिने तथा नेपाल राजपत्रमा प्रकाशन गर्ने निर्णय पनि गरेको छ ।