चोलेन्द्रले गरे आफ्नो बयानको ६५ पेजसम्म हस्ताक्षर, बाँकी पेजमा भोलि गराइने

निलम्बित प्रधानन्यायाधीश चोलन्द्रशमशेर जबराले शुक्रवार आफ्नो बयानको ६५ पेजसम्म हस्ताक्षर गरेका छन् । उनले ६५ पेजसम्म बयानमा हस्ताक्षर गरेपछि महाभियोग सिफारिस समितिको बैठक स्थगित भएको छ । 

महाभियोग सिफारिस समितिको शुक्रवार बिहान ९ बजेदेखि शुरू भएको बैठकमा चोलेन्द्रलाई आफ्नो बयान पढेर सुनाउने र हस्ताक्षर गराउने काम भएको थियो । शुरुमा समिति सदस्यहरूले चोलेन्द्रलाई १ सय ७४ पेज लामो बयानको अन्त्यमा हस्ताक्षर गर्न आग्रह गरेका थिए । तर, चोलेन्द्रले हस्ताक्षर गर्न अस्वीकार गरेपछि उनलाई बयानको प्रत्येक पृष्ठ पढेर सुनाउँदै हस्ताक्षर गराउने गरिएको थियो ।

बाँकी बसेको प्रतिवेदन पढ्ने र हस्ताक्षर गर्ने काम भोलि सम्पन्न गर्ने तयारी छ । त्यसका लागि समितिको बैठक शनिवार बिहान ८ बजे नै बोलाइएको छ । हस्ताक्षर सम्पन्न गरेपछि चाेलेन्द्रलाई पूरक प्रश्न सोध्ने तयारी छ ।

समिति बैठकमा चोलेन्द्रले आफूले बोलेको भिडियो र अडियो आफ्नै हो भनेर हस्ताक्षर गर्ने तर प्रत्येक पेजमा नगर्ने अडान लिएका थिए । तर, समितिको प्रतिवेदनमा बयानमा हस्ताक्षर गर्नैपर्ने समितिको अडानपछि हस्ताक्षर गर्न चोलेन्द्र राजी भएका थिए ।

समितिले तयार गरेका ४३ प्रश्नको जवाफ समेटेर समितिले चोलेन्द्रको बयान १७४ पेजमा उतारेको छ ।