अभिनेता प्रदीप खड्काले चलचित्र विकास बोर्डका अध्यक्ष भुवन केसीले आफ्नो पदबाट राजीनामा दिनुपर्ने बताएका छन् । बोर्डले असोजदेखि राति ११ बजेपछि हल सञ्चालन गर्न नपाइने र आवश्यक परेको खण्डमा जिल्ला प्रशासन कार्यालयबाट अनुमति लिनुपर्ने प्रावधानलाई कडाइ गरेको छ । 

विकास बोर्डको यो निर्णय असोज ७ गतेदेखि विश्वभर प्रदर्शन हुन लागेको आफ्नो चलचित्र ‘प्रेमगीत–३’प्रति लक्षित रहेको भन्दै अभिनेता खड्काले अध्यक्ष केसीको राजीनामा मागेका हुन् । शनिवार चलचित्रबारे जानकारी दिन आयोजना गरिएको पत्रकार सम्मेलनमा अभिनेता खड्कासँगै निर्माता एवं निर्देशन सन्तोष सेन आक्रामक सुनिए । 

अभिनेता खड्काले बोर्ड अध्यक्ष केसीप्रति लक्षित गर्दै भने, ‘मैले गलत नीति नियम लगाउने, सोँच विवेक प्रयोग नगर्ने, अरुबाट संचालन हुने व्यक्ति त्यो ठाउँमा बस्न लायक छैन भन्या हो ।’ 

मदिरा सेवन गर्दै हेरिने डान्सबार रातभर खुला हुने तर कफी र पपकर्न खाँदै हेरिने चलचित्र हल बन्द गर्ने निर्णय गलत भएको प्रदीपको भनाइ थियो । उनले आफूहरू पैसा कमाउनेभन्दा धेरै दर्शकले चलचित्र हेरुन् भन्ने पक्षमा रहेको बताए ।

‘हामीले पैसा कमाउनुभन्दा पनि धेरैभन्दा धेरै दर्शकले चलचित्र हेरुन भन्ने पक्षमा हो’, खड्काले भने, ‘११ बजे बन्देज लगाएर ८ः३०, ९ बजे शो हाल्न नसकिने अवस्था चाहिँ हटाइदिनुहोस् ।’ 

निर्माता एवं निर्देशन सन्तोष सेनले आफूलाई चलचित्रसँग सम्बन्धित संघसंस्था कतैबाट साथ नमिलेको बताए । चलचित्र प्रदर्शन अगाडि आफूलाई धेरैतिरबाट हतोत्साही बनाइएको सेनले बताए ।