नेपाल प्रहरीका पूर्व प्रहरी महानिरीक्षक (आईजीपी) सर्वेन्द्र खनाल नेकपा एमाले प्रवेश गर्ने भएका छन् । 

बुधवार एमाले अध्यक्ष केपी शर्मा ओलीसँग बालकोटमा भेटेपछि खनाल एमाले प्रवेश गर्न तयार भएका हुन् । 

बुधवार ओली निवासमा भएको भेटमा ओली र खनालबीच राजनीतिक जिम्मेवारीबारे समेत कुराकानी भएको बालकोट स्रोतले बताएको छ । 

बिहीवार ललितपुरको च्यासलस्थित पार्टी कार्यालयमा विशेष कार्यक्रम आयोजना गरेर खनाललाई एमाले प्रवेश गराउने तयारी रहेको एमाले नेताहरूले बताएका छन् । 

ओलीसँगको भेटमा खनाललाई आगामी चुनावमा उम्मेदवार बनाउन सकिने निर्वाचन क्षेत्रबारे समेत प्रारम्भिक छलफल भएको बालकोट स्रोतले बताएको छ तर उनलाई कहाँबाट उम्मेदवार बनाउने भन्ने अहिल्यै टुंगो भने लागिसकेको छैन । 

२०७७ वैशाखमा पूर्व स्वास्थ्य राज्यमन्त्री सुरेन्द्र यादवलाई अपहरण गरेको आरोपमा खनाल पनि मुछिएका थिए । 

एमालेका अर्का नेता महेश बस्नेत, अहिले एकीकृत समाजवादीमा गएका किसान श्रेष्ठ र सर्वेन्द्र खनालले तत्कालीन प्रधानमन्त्री एवं तत्कालीन नेकपा अध्यक्ष केपी शर्मा ओलीको निर्देशनमा यादवलाई अपहरण गरेर काठमाडौं ल्याएको आरोप लागेको थियो । 

उक्त प्रकरणमा नेपाल प्रहरीमा उजुरी दर्ता भएको भए पनि पछि प्रमाण पाइएअनुसार हुने गरी उजुरी तामेलीमा राखिएको थियो ।