नेकपा एमालेका स्थायी कमिटी सदस्य घनश्याम भुसालले अनेकौं संकटका बाबजुद पनि कम्युनिष्ट आन्दोलनलाई विचारले नै डोर्‍याउने संकल्प गरेको बताएका छन् । 

जनकपुरका दुई जना नेताहरूसँग बाटोमा भेट भएको तस्वीर भुसालले आफ्नो फेसबुक एकाउण्टमा शेयर गर्दै पार्टी भित्र स्वार्थ हावी भएको सन्दर्भ उल्लेख गरेका छन् । 

उनले भनेका छन्, ‘जनकपुरका कमरेडहरूसँग अचानक बाटोमा भेट भयो । तराईका जिल्लाहरूमा वैचारिक प्रशिक्षणका दौरानमा भएको भेट सम्झना गर्‍याैं । उहाँहरूले, पार्टीभित्र वैचारिक प्रशिक्षण कमजोर हुँदै जाँदा स्वार्थहरू हावी भएकोले पार्टीमा ईमानदार कार्यकर्ता पाखा लाग्दै जाने संकटबारे चिन्ता गर्नुभयो । हामीले अनेकौं संकटका बाबजुद पनि कम्युनिस्ट आन्दोलनलाई विचारले नै डोर्‍याउने  संकल्प गर्‍याैं ।’

पछिल्लो समय नेकपा एमालेमा भुसाललाई निवार्चनबाट धकेल्न खोजिएको चर्चा हुन थालेको छ । एमाले अध्यक्ष केपी शर्मा ओलीले भुसालको निर्वाचन क्षेत्र रूपन्देही–३ मा राष्ट्रिय प्रजातन्त्र पार्टीसँग चुनावी तालमेल गरेर भुसाललाई चुनावमा टिकट नदिने रणनीति अपनाएको राजनीतिक वृत्तमा चर्चा छ । 

यस्तो चर्चा भइरहेको बेला भुसालले पार्टीमा स्वार्थहरू हावी भएकोले पार्टीमा ईमानदार कार्यकर्ता पाखा लाग्दै जाने संकटबारे चिन्ता गरेको कुरा आफ्नो स्टाटसमा उल्लेख गर्नुलाई अर्थपूर्णरूपमा लिन सकिन्छ ।