नेकपा माओवादी केन्द्रका उपमहासचिव वर्षमान पुन ‘अनन्त’ले रोल्पामा प्रतिनिधिसभा सदस्यमा उम्मेदवारी दर्ता गराएका छन् । 

पुनले सत्तारुढ गठबन्धनका तर्फबाट लिवाङस्थित प्रमुख निर्वाचन अधिकृतको कार्यालयमा वारेसमार्फत उम्मेदवारी दर्ता गराएका हुन् ।
 
पुनका तर्फबाट माओवादी रोल्पा संयोजक गुणेन्द्र घर्तीमगरले उम्मेदवारी दर्ता गराएका थिए । पुनको उम्मेदवारीको समर्थकमा रोल्पा नगरपालिकाका निवर्तमान प्रमुख पूर्ण केसी र समर्थकमा माओवादी लुम्बिनी प्रदेश परिषद्का सदस्य भानबहादुर घर्ती छन् । 

सत्तारुढ गठबन्धनको सिट बाँडफाँट कार्यदलका सदस्य समेत रहेका पुनले व्यस्तताका कारण उम्मेदवारी दर्तामा आफैं उपस्थित हुन नसकेको बताए । ‘राष्ट्रिय राजनीतिक जिम्मेवारीका कारण उम्मेदवारी दर्तामा सहभागी हुन सकिनँ । गएराति अबेरसम्म पनि कतिपय निर्वाचन क्षेत्रको सिट बाँडफाँटको काममा व्यस्त थिएँ,’ पुनले भने, ‘फेरि एकपटक रोल्पाली जनताको प्रतिनिधिका रूपमा काम गर्न मैले उम्मेदवारी दिएको छु ।’

प्रतिनिधि सभामा १ मात्र निर्वाचन क्षेत्र रहेको रोल्पाबाट पुन यसअघि २०७४ सालमा निर्वाचित भएका थिए । उनी २०६४ सालको संविधानसभा निर्वाचनमा ललितपुर–१ बाट निर्वाचित भएका थिए । प्रदेश सभातर्फ भने प्रदेश (१) बाट माओवादीका जोखबहादुर महरा र (२) बाट कांग्रेस लुम्बिनी प्रदेश सभापति अमरसिंह पुनले उम्मेदवारी दर्ता गराएका छन् ।