पूर्व सभामुख ओनसरी घर्तीले सत्ता गठबन्धनका तर्फबाट प्रतिनिधिसभा सदस्यमा काठमाडौं–२ बाट उम्मेदवारी दर्ता गरेलगत्तै बेपत्ता परिवारसँग भेटघाट गरेकी छन् । 

थलीस्थित निर्वाचन अधिकृतको कार्यालयमा उम्मेदवारी मनोनयन दर्तालगत्तै घर्तीले आइतवार साँझ कागेश्वरी मनोहरा नगरपालिका–६ मुलपानीस्थित बुद्धि पोखरेलको घर पुगेर उनका परिवारसँग भेटेकी हुन् ।  

माओवादी कार्यकर्ता पोखरेललाई तत्कालीन राज्य पक्षले २०६१ सालमा नियन्त्रणमा लिएर बेपत्ता पारेको थियो । त्यस क्रममा उनले पोखरेलका वृद्ध बुवाआमासहित परिवारका सदस्यसँग विजयको आशिर्वाद लिइन् । पोखरेल परिवारले सभामुखका रूपमा भूमिका निर्वाह गरिसकेकी घर्तीलाई उम्मेदवारका रूपमा पाउनु खुशीको कुरा भएको भन्दै विजयको शुभकामना दिएकी थिइन् ।

पोखरेलकी आमाले आफ्ना छोराछोरी नै पार्टी भएको भन्दै अभिभावकत्व लिइदिन भनिन् । जवाफमा घर्तीले आफूहरू शहीद, बेपत्तासहित आमजनताको विकास र समृद्धि प्राप्तिको चाहनाका लागि सक्रिय रहँदै आएको बताइन् ।

माओवादी स्थायी समिति सदस्य समेत रहेकी घर्ती २०७२ सालमा संविधान सभाबाट संविधान जारी भएपछि रूपान्तरित प्रतिनिधि सभामा सभामुख थिइन् । त्यसअघि दोस्रो संविधान सभामा उनले उपसभामुखका रूपमा काम गरेकी थिइन् । एकपटक प्रत्यक्ष र २ पटक समानुपातिक पद्धति तर्फबाट सांसद भएकी घर्तीलाई सत्तारुढ गठबन्धनले उम्मेदवार बनाएको हो ।

गठबन्धनबाट घर्तीसँगै काठमाडौं–२ (१) मा कांग्रेसका ध्रुव केसी र (२) मा एकीकृत समाजवादीका भरतप्रसाद फुँयालले उम्मेदवारी दिएका छन् ।