चलचित्र ‘प्रेमगीत ३’ले नेपालमा १३ करोड रुपैयाँ बढी कमाई गरेको छ ।

असोज ७ गतेदेखि प्रदर्शनमा आएको यस चलचित्रले तीन सातामा नेपालमा १३ करोड २८ लाख रुपैयाँ ग्रस कलेक्सन गरेको निर्माण पक्षले जानकारी दिएको छ । 

चलचित्र गत शुक्रबारदेखि चौथो सातामा प्रदर्शनरत छ । चौथो सातामा पनि चलचित्र हेर्न दर्शकको उपस्थिति राम्रो छ । 

चलचित्रले नेपालमा प्रदर्शनको पहिलो साता ७ करोड ९६ लाख रुपैयाँ ग्रस कलेक्सन गरेको थियो । 

त्यस्तै, दोस्रो साता ३ करोड ८५ लाख ग्रस कलेक्सन गरेको चलचित्रले नेपालमा तेस्रो साता १ करोड ४७ लाख कलेक्सन गरेको हो । 

चलचित्रले तीन सातामा विश्वभरबाट कति कलेक्सन गर्यो ? त्यो भने निर्माण पक्षले सार्वजनिक गरेको छैन । दुई सातामा चलचित्रले विश्वव्यापी रुपमा ३४ करोड रुपैयाँ कलेक्सन गरेको थियो ।

तीन सातामा चलचित्रले विश्वभरभर झण्डै ५० करोड कलेक्सन गरेको निर्माण पक्षको आँकलन छ । 

यद्यपी, तीन साताको विश्वव्यापी कलेक्सन आज (आईतबार) साँझसम्म मात्रै आईपुग्ने निर्माता एवं निर्देशक सन्तोष सेनले लोकान्तरलाई जानकारी दिए । 

सन्तोष सेन र स्वर्गीय छेतेन गुरुङको निर्देशन रहेको ‘प्रेमगीत ३’ ३ दर्जन बढी देशमा एकसाथ प्रदर्शनमा आएको हो । 

चलचित्रमा प्रदीप खड्का र क्रिस्टिना गुरुङसँगै शिव श्रेष्ठ, सुनिल थापा, मनिष राउत, सन्तोष सेन, माओत्से गुरुङ, पुस्कर कार्की, प्रेम पुरी, अनुभव रेग्मी, योगिशा खत्री, जीवन भट्टराई, लक्ष्मी बर्देवा लगायतको अभिनय छ । चलचित्र आगामी महिना पाकिस्तानमा समेत प्रदर्शनमा आउँदैछ ।