बैंक तथा वित्तीय संस्थाहरूले व्याज बढाएको विरोधमा रुपन्देहीका उद्योगी व्यवसायीहरूले प्रदर्शन गरेका छन् । बैंक तथा वित्तीय संस्थाहरू आफू मोटाउने र उद्योगी व्यवसायीलाई समाप्त पार्ने गरी व्याजदरमा चर्को वृद्धि गरेको भन्दै रुपन्देहीमा क्रियाशील उद्योग वाणिज्य संघहरूले सोमवार बुटवलमा विरोध प्रदर्शन गरेका हुन् । 

बुटवल उद्योग वाणिज्य संघका महासचिव विमलराज भट्टराई बैंक तथा वित्तीय संस्थाहरूलाई सचेत गराउनको विरोध प्रदर्शन गरिएको बताए । ‘हाम्रो माग सुनुवाई भएन भने अझै ससक्त आन्दोलन चर्काउने छौँ’, भट्टराईले भने । 

बुटवल उद्योग वाणिज्य संघको सचिवालय बालमन्दिरबाट शुरु भएको विरोध प्रदर्शन अमरपथ, विपी चोक, राममन्दिर लाइन हुँदै जेसीज चोकमा पुगेर समापन गरिएको थियो । विरोध प्रदर्शनको समापन कार्यक्रममा बोल्दै बुटवल उद्योग वाणिज्य संघका अध्यक्ष उज्ज्वलप्रसाद कसजूले कोभिड–१९ को महामारीबाट थलिएका उद्योगी व्यवसायीहरू तरलता अभावले झनै पिल्सिनु परेको र त्यसमाथि बैंक तथा वित्तीय संस्थाहरूले महिनै पिच्छे व्याजदर वृद्धि गर्दै जाँदा भएका उद्योग, व्यापार, व्यवसाय पनि बन्द गर्नुपर्ने स्थिति आएको बताए । 

‘बैंक तथा वित्तीय संस्थाहरूलाई राष्ट्र बैंकले नियन्त्रणमा राख्नु पर्ने हो’, उनले भने, ‘राष्ट्र बैंकले लगाम छोडिदिँदा बैंक तथा वित्तीय संस्थाहरूमा मोनोपली भएको छ । जसका कारण ८÷९ प्रतिशतमा रहेको बैंकको व्याजदर बृद्धि भएर अहिले १५/१६ प्रतिशतसम्म पुगिसकेको छ ।’

त्यस्तै बैंक तथा वित्तीय संस्थाहरूले लिने प्रिमियम दर १ प्रतिशतभन्दा बढी बनाउन नहुने, बैंकले शुरुमा लगानी गरेको व्याजदर कम्तिमा १ वर्षसम्म ऋणीको सहमति बिना बढाउन नपाइने, चालु पुँजीको नियम तत्कालै लागू गर्दा उद्योगी व्यवसायीहरूलाई कठिन हुने भएकाले कम्तिमा आर्थिक अवस्था सहज भएपछि लागू गर्न माग गरिएको छ ।