नेपाल प्रहरीले निर्वाचनका लागि ल्याएको नयाँ गाडी तिहारपछि वितरण गर्ने भएको छ । प्रहरीले आगामी मंसिर ४ मा हुने प्रतिनिधि सभा र प्रदेश सभा निर्वाचनका लागि भनेर १८० वटा गाडी खरिद गरेको छ । उक्त गाडी केही दिनभित्रै आइपुग्ने र तिहारपछि बाँडिने प्रहरीले जानकारी दिएको छ । 

प्रहरीले १०० वटा महिन्द्राको स्कोरपियो र ८० वटा टाटाको योद्धा पिकअप भ्यान किन्न लागेको छ । यसपटक प्रहरीले गाडी नेपालमा रहेका डिलरहरूबाट खरिद गरेको छ । प्रहरीले खरिद गर्न लागेकामध्ये अहिलेसम्म ३५ वटा गाडी प्राप्त गरिसकेको छ । उक्त गाडीमा सञ्चार सेटहरू जडान गरिरहेको छ । अरु गाडीहरू पनि केही दिनमा आएपछि वितरण गर्ने तयारी भइरहेको प्रहरी प्रवक्ता प्रहरी नायब महानिरीक्षक (डीआईजी) टेकप्रसाद राईले जानकारी दिए । 

‘गाडीहरू आउने क्रममा छन्, केही आएका छन् । त्यसलाई तिहारपछि वितरण गर्ने तयारीमा छौँ’, डीआईजी राईले भने । 

सरकारले प्रहरीका लागि ७५ करोड रुपैयाँ निर्वाचन लक्षित बजेट छुट्याएको थियो ।

२०७० सालमा किनेका सवारीसाधन बिग्रेकाले त्यसलाई विस्थापन गर्नुपर्ने प्रहरीको भनाइ छ । उक्त सवारीसाधन सबै विस्थापन गर्नुपर्ने भन्दै प्रहरीले सरकारसँग यो निर्वाचनमा एक हजार ४०० गाडी किन्ने बजेट माग गरेको थियो । 

देशमा आर्थिक अवस्था कमजोर भएको भन्दै वैशाखमा भएको स्थानीय तह निर्वाचनमा सरकारले प्रहरीलाई सवारीसाधन किन्न बजेट उपलब्ध गराएको थिएन । 

प्रहरीले स्थानीय तह निर्वाचनमा १ हजार २०० सवारीसाधन भाडामा लिएर चलाएको थियो । आगामी चुनावका लागि प्रहरीले १ हजार ५२९ पिकअप भ्यान, ११० वटा ‘वान टन’ गाडी र बस किन्नका लागि बजेट माग गरेको थियो । 

प्रहरीले संगठनलाई ७ हजार ८९४ सञ्चार सेट र हतियार आवश्यक रहेको बताएको छ । सरकारसँग प्रहरीले उक्त संख्यामा सञ्चार सेट र हतियार खरिद गर्ने बजेटसमेत माग गरेको थियो । स्थानीय तह चुनावमा प्रहरीले सेनाबाट हतियार सापट लिएर चलाएको थियो । मंसिर ४ को निर्वाचनमा पनि प्रहरीले सेनाबाटै हतियार सापटी लिएर काम चलाउने भएको छ ।