नेकपा एमालेका उपाध्यक्ष तथा पूर्वअर्थमन्त्री विष्णुप्रसाद पौडेलले अहिले देशव्यापी रूपमा एमाले रोज्नेहरूको लहर चलेको बताएका छन् । देशका मुख्य शक्ति मानिएका ५/७ दलहरूले एमालेविरुद्ध मोर्चाबन्दी गरिरहेको समयमा एमालेमा प्रवेश गर्नेको जनलहरले सबैलाई उत्साह थपेको उनको भनाइ थियो । 

आइतवार रुपन्देहीको तिलोत्तमास्थित पार्टी प्रवेश कार्यक्रममा बोल्दै नेता पौडेलले सबै शक्तिहरू मिलेको समयमा एमाले आउनेको जनलहरले नै यसको लोकप्रियताबारे प्रष्ट पारेको बताए । ‘यो आमनागरिकको हितमा बोल्ने, लड्ने पार्टी हो भन्ने यो जनलहरले प्रमाणित गरेको छ, सबै शक्ति एकातिर मोर्चा बनाउँदा पनि आमनागरिकले हामीलाई साथ दिनुभएको छ, पार्टीमा आउने सबैलाई उपयुक्त जिम्मेवारी दिइने छ, सम्मानजनक जिम्मेवारी दिइने छ’, नेता पौडेलले भने । 

रुपन्देही क्षेत्र नं २ मा प्रतिनिधिसभाको उम्मेदवार रहेका नेता पौडेलले एमाले सरकारमा रहँदा सुकुम्बासी समस्या समाधानको लागि गरिएको अन्तिम तयारी, विकासका प्रभावकारी योजना, राष्ट्रहितका लागि गरिएको अडान सबै नेपालीको सामु छर्लङ्ग भएको बताए । 

निर्वाचनका बेला अन्य पार्टीले एमालेले शुरु गरेका कामहरूलाई आफूले गरेको भन्दै प्रचार गरेको र एमालेविरुद्ध अनेक भ्रामक कुराहरू प्रचारमा ल्याएकाले सबै सचेत कार्यकर्ताले सबैलाई सचेत बनाउनुपर्ने उनले बताए । 

एमाले पोलिटब्युरो सदस्य तथा प्रदेश सभाका उम्मेदवार लीला गिरीले एमाले नेतृत्वमा यसअघि तीनै तहका सरकारले गरेका असल अभ्यासहरूलाई गठबन्धन सरकारले अलपत्र पारेको बताए । सो कार्यक्रममा नेपाली कांग्रेस तथा नेकपा माओवादी छाडेका ५६ जना एमालेमा प्रवेश गरेका थिए ।