आगामी शुक्रवारदेखि प्रदर्शनमा आउने नेपाली फिल्म ‘महापुरुष’को ग्राण्ड प्रिमियर शो आयोजना गरिएको छ । आइतवार बेलुका राजधानीमा गरिएको प्रिमियरमा पुगेर थुप्रै फिल्मकर्मी एवं सञ्चारकर्मीहरूले ‘जात्रा’ फ्रेम्ड निर्देशक प्रदीप भट्टराई निर्देशित एवं महजोडी अभिनित फिल्म हेरेका छन् । 

प्रदर्शनको पाँच दिन अगाडि बिरलै फिल्मले प्रिमियर गर्ने आँट गर्छन् । किनकि, प्रिमियरमा मिलेको प्रतिक्रियाले फिल्म चम्किन र डुब्न पनि सक्छ । यद्यपि, ‘महापुरुष’ फिल्मले प्रिमियरमा प्रशंसा मात्र कमाएको छ । अभिनेता दीपकराज गिरी, किरण केसी, निश्चल बस्नेतदेखि स्वस्तिमा खड्का, केकी अधिकारीसम्मले फिल्म एकदमै राम्रो बनेको बताएका छन् । कलाकार किरण केसीले ‘महापुरूष’ उत्कृष्ट फिल्म बनेको भन्दै तारिफ गरे । 

फिल्म हेरेपछि अभिनेता दीपकराज गिरीले फेसबुकमा लेखेका छन्, ‘महापुरुष । पारिवारिक मिठो फिल्म स–परिवार हेर्नु होला । हाम्रो महा–विश्वविद्यालय आदरणीय हरि दाइ, मदन दाइ, त्यस्तै प्रिय भाइ प्रदीप भट्टराई, रविन्द्र सिंह बानियाँ तपाईंहरूको मेहनत सफल होस् । सम्पूर्ण टिमलाई शुभकामना ।’ 

अभिनेता एवं निर्देशक निश्चल बस्नेतले ‘महापुरुष’लाई प्रदीप भट्टराईको अर्को ब्लकबस्टर फिल्म भनेका छन् । ‘प्रदीप भट्टराईको फेरि अर्को ब्लकबस्टर महापुरुष । महको स्वाद गज्जब छ । भाइटीकाको भोलिपल्ट, ढुक्क भएर टिकट काट्नुहोला’, निश्चलले फेसबुकमा लेखेका छन् । 

फिल्म हेर्न निश्चल श्रीमती स्वस्तिमा खड्कासँग हल पुगेका थिए । अभिनेत्री स्वस्तिमाले फिल्म हेर्दा मज्जा आएको सञ्चारकर्मीमाझ प्रतिक्रिया दिइन् । उनले भनिन्, ‘फिल्ममा जुन कुरा देखाइएको छ, त्यो धेरै राम्रोसँग पस्किएको छ । कलाकार छनोट एकदमै राम्रो छ । नयाँ कलाकार अरुण क्षेत्रीले त फाडिदिएको छ । प्रदीप भट्टराई दाइले अब डबल ह्याट्रिक गर्नुहुनेछ ।’ 

अर्की अभिनेत्री केकी अधिकारी ‘महापुरूष’लाई फिल्म मात्र भन्न चाहन्नन् । उनले फिल्मले बलियो सन्देश प्रवाह गरेको उनको बुझाइ छ । उनले भनिन्, ‘यो फिल्म मात्र होइन, बलियो सन्देश बोकेको फिल्म हो । फिल्मले प्रश्न खडा गर्छ । बुबा–आमाको सम्बन्ध हामी स्वीकार गर्दैनौँ । हामीले यो सही गरेका छौँ कि गलत भनेर फिल्मले प्रश्न छोडेर जान्छ । कलाकारको काम त कुरै नगरौँ ।’ 

बेनिशा हमालले फिल्म राम्रो मात्र नभई एकदमै राम्रो बनेको भन्दै प्रशंसा गरिन् । अभिनेता एवं निर्देशक खगेन्द्र लामिछाने ‘महापुरूष’लाई बाको कथामा बनेको उत्कृष्ट फिल्म भन्छन् । उनले बालकदेखि वृद्धसम्मले फिल्म हेर्नुपर्ने बताउँछन् । ‘नेपालमा बाहरूको कथामा फिल्मै बनेका थिएनन् । महापुरूषले बाको कथा उठाएको छ । फिल्म अत्यन्त बलियो छ’, खगेन्द्र भन्छन्, ‘फिल्ममा इमोसन, कमेडी, सन्देश सबै छ । यो फिल्म बच्चादेखि बुढासम्मलाई हेराउनु पर्छ । परिवारमा बाको भूमिका के हुन्छ भन्ने कुरा यो फिल्मले देखाएको छ ।’

पछिल्लो समय निकै तारिफ पाएको फिल्म ‘ऐना झ्यालको पुतली’का निर्देशक सुजित बिडारीले फेसबुकमा स्टाटस लेख्दै गज्जब फिल्म दिएकोमा निर्देशक प्रदीप भट्टराईसहित निर्माण टिमलाई धन्यवाद दिएका छन् । प्रिमियरमा ‘महापुरुष’का कलाकारहरू मदनकृष्ण श्रेष्ठ, हरिवंश आचार्य, गौरी मल्ल, अरुण क्षेत्री, अञ्जना बराईली, राजाराम पौडेल, रबिन्द्र सिंह बानियाँलगायत उपस्थित थिए । 

निर्देशक प्रदीप भट्टराईले आफ्नो फिल्म देखाउन प्रिमियरमा पहिलोपटक आमा–बुबालाई लगेका थिए । षट्कोण आर्ट्सको व्यानरमा निर्मित ‘महापुरुष’का कार्यकारी निर्माता रविन्द्र सिंह बानियाँ हुन् भने निर्माता म्याक्स दिपेश खत्री हुन् । एकल पिताको बुढ्यौली उमेरमा अंकुराएको प्रेम र विवाह गर्न खोज्दा परिवार र समाज कसरी बाधक बन्छ भन्ने कुरालाई फिल्ममा मनछुने ढुंगबाट प्रस्तुत गरिएको छ ।