अगामी निर्वाचनका लागि रुपन्देही–३ बाट प्रतिनिधि सभा सदस्यमा उम्मेदवारी दिएका नेपाली कांग्रेसका केन्द्रीय सदस्य एवं गृहमन्त्री बालकृष्ण खाणलाई जनमुक्ति पार्टीले पनि समर्थन गरेको छ ।

भैरहवामा आयोजित एक कार्यक्रममा रुपन्देही–३ को जनमुक्ति पार्टीका उम्मेदवार मोजिब अलीले पार्टी र व्यक्तिगत रूपमा नेपाली कांग्रेस (गठबन्धन) का उम्मेदवारलाई सर्मथन गरेको घोषणा गरे । रुपन्देही–३ मा जनमुक्ति पार्टीको करिब तीन हजार मत छ । गठबन्धनको तर्फबाट रुपन्देही–३ मा नेपाली कांग्रेसका केन्दीय सदस्य एवं गृहमन्त्री बालकृष्ण खाण उम्मेदवार छन् ।

रुपन्देहीमा पाँच दलीय गठबन्धन र जनमुक्ति पार्टीबीच प्रतिनिधि सभा र प्रदेश सभामा तालमेल गरेर अघि बढ्ने सहमति भएको कांग्रेस रुपन्देहीका सभापति रामकृष्ण खाणले बताए ।

उनका अनुसार जनमुक्ति पार्टीले रुपन्देहीको निर्वाचन क्षेत्र १, ३, ४, ५ बाट प्रतिनिधि सभा सदस्य र २ (क), २ (ख) र ३ (ख) मा प्रदेश सभा सदस्यमा उम्मेदवारी दिएका गठबन्धनका उम्मेदवारलाई तथा गठबन्धनले रुपन्देही २ बाट प्रतिनिधि सभामा उम्मेदवारी दिएका जनमुक्ति पार्टीका उम्मेदवारलाई सर्मथन गर्ने भएको छ ।

जनमुक्तिले समर्थनले जिल्लामा गठबन्धनका उम्मेदवारहरू सहजै विजयी हुने सभापति खाणको दाबी छ । अन्य दलका प्रभावशाली नेताहरू आबद्ध पार्टी परित्याग गरेर कांग्रेसमा प्रवेश गर्ने क्रम जारी छ ।