आगामी मंसिर ४ गते हुने प्रतिनिधिसभा र प्रदेशसभा निर्वाचनको मतगणना स्थलमा तारजाली लगाएर बारबेर नगर्ने निर्वाचन आयोगले बताएको छ । 

बुधवार निर्वाचन आयोगले आयोजना गरेको पत्रकार सम्मेलनमा निर्वाचन आयोगका प्रमुख आयुक्त दिनेश थपलियाले मतदान केन्द्रमा तारजाली नलगाउने बताएका हुन् । 

‘यो देशमा कोही जाली छैन । मतगणनास्थलमा किन जाली लगाइरहनुपर्‍यो ?’ थपलियाले भने । 

मतगणना स्थलमा स्थानीय तहको सहयोगमा सीसीटीभी भने जडान हुने उनले बताए । ‘मतगणना स्थलमा सीसीटीभी जडान गर्न निर्वाचन आयोगले कुनै बजेट छुट्याएको छैन तर मतगणना हुने १६५ स्थलमा स्थानीय तहलाई अनुरोध गरेर सीसीटीभी जडान गरिदिन भन्नेछौं । मतगणना स्थलमा तारजाली लगाउने होइन, सुरक्षाका अन्य उपाय अपनाउनेछौं,’ थपलियाले भने । 

स्थानीय तहको मतगणना स्थलमा तारजाली लगाएर सुरक्षा घेरा बनाएपछि त्यसको तीव्र आलोचना भएको थियो । आगामी निर्वाचनमा भने त्यसलाई सच्याउने आयोगले बताएको छ ।