काठमाडौं २ मा राष्ट्रिय प्रजातन्त्र पार्टीको तर्फबाट उम्मेदवार बनेकी कुन्ती पोख्रेलले नेपाली कांग्रेसले नेकपा माओवादी केन्द्रसँग गठबन्धन गरेर असल कार्यकर्ता, शुभचिन्तक तथा मतदाताको भावनामा ठेस पुर्‍याएको आरोप लगाएकी छन् । 

मतदाता भेटघाट तथा घरदैलो कार्यक्रममा उनले कांग्रेसले आफ्ना मतदाताको भावनामा ठेस पुर्‍याएको बताएकी हुन् । ‘रुख’ चिन्हमा मतदान गरिरहेका मतदातालाई सिद्धान्त नमिल्ने पार्टीसँग गठबन्धन गरेर माओवादीलाई भोट हाल्न लगाउनु दुःखद भएको उनको आरोप छ । उनले नेपाली कांग्रेस क्षेत्र नं २ का कार्यकर्ता तथा मतदाताहरुलाई कांग्रेससँग  सिद्धान्तसँग नजिक रहेको राप्रपाको ‘हलो’ चिन्हमा भोट हाल्न आव्हान गरेकी छन् । 

उनले देशको राष्ट्रियता, सार्वभौमिकताको रक्षा, देशको सर्वाङ्गीण विकासको लागि राप्रपाको हलो चिन्हमा मतदान गर्नुपर्ने बताइन् । ‘आफ्नो सिद्धान्त एकातिर, चिन्ह अर्कातिर, भोट अर्कैतिर हुने अनि कार्यकर्ताले चित्त दुखाउने हुन्छ ?’, उनले प्रश्न गरिन् ।