गृहमन्त्री बालकृष्ण खाणले उद्योगी, व्यवसायी, श्रमिक, मजदूर र आम नागरिकलाई समस्या पर्ने गरी ब्याज वृद्धि नगर्न बैंक तथा वित्तीय संस्थालाई निर्देशन दिएका छन् ।

रूपन्देही सियारी गाउँपालिका–६ सर्जुगञ्जमा सोमबार भएको कार्यक्रममा गृहमन्त्री खाणले जथाभावी ब्याजदर वृद्धि गर्दा अर्थतन्त्रमा नकारात्मक प्रभाव परि मुलुक समस्यामा पर्न सक्ने बताए । 

उपयुक्त कारणबिना सरकारको निर्देशनविपरित जथाभावी ब्याजदर बढाएमा कारबाही गर्ने गृहमन्त्री खाणले बताए । 

आम नागरिकलाई मर्का पर्ने गरी ब्याजदर बढाउँदा कारबाही गर्न कानूनले दिएन भने कानून संशोधन गर्न सरकार तयार हुने उनको भनाई छ । 

यो भन्दा अघिल्लो एमाले नेतृत्वको सरकारको नीतिका कारण उद्योगी व्यवसायी समस्यामा परेको भन्दै मंसिर ४ गतेको निर्वाचनमा पाँच दलीय गठबन्धनले जितेपछि सही नीति ल्याएर पुरानै अवस्थामा फर्काउने उनले बताए । 

वर्तमान गठबन्धन सरकारका कारण उद्योग व्यवसाय समस्यामा परेको नभई अघिल्लो सरकारको गलत नीतिका कारण समस्यामा सृजना भएको उनले बताए ।