नेपाली कांग्रेसका वरिष्ठ नेता डा. शेखर कोइरालाले अहिलेको सत्ता गठबन्धनबाटै सरकार बन्ने बताएका छन् । अब कन्ने सरकारले जनताले खोजेको कुरा गर्न सक्छ कि सक्दैन भन्ने चिन्ताको विषय रहेको उनले बताए । 

मंगलवार विराटनगरमा आयोजित ‘बाटो बिराएको राजनीति’ पुस्तक विमोचान कार्यक्रमलाई सम्बोधन गर्दै कोइरालाले गठबन्धनबाटै सरकार बन्ने बताएका हुन् । ‘गठबन्धनको नेतृत्वमा सरकार बन्छ, त्यसमा चिन्ता गरिराख्नु पर्ने आवश्यकता छैन । त्यो सरकारले तपाईं हामीहरूले खोजेको कुरा गर्न सक्छौँ कि सक्दैनौँ ? त्यो च्यालेन्ज हामीहरूसँग छ’, कोइरालाले भने, ‘होइन भने नयाँ–नयाँ पार्टीले कस्तो सेप लिन्छ, आफ्नो ठाउँमा छ ।’

कोइरालाले प्रत्यक्षतर्फ कांग्रेसले राम्रो नतिजा ल्याए पनि समानुपातिकतर्फको पपुलर घट्नु चिन्ताको विषय भएको बताए ।  

लोकान्तर डट्कममा प्रकाशित लेखहरूको संग्रह ‘बाटो बिराएको राजनीति’ लोकान्तर सञ्चार प्रालिले प्रकाशित गरेको हो ।