राष्ट्रिय स्वतन्त्र पार्टीका सभापति एवं संसदीय दलका नेता रवि लामिछानेले ४ मंसिरको चुनावमा आफूहरूले पाएको मत निराशाको नभई आशाको मत भएको बताएका छन् । 

संसद्को पहिलो बैठकलाई सम्बोधन गर्दै लामिछानेले नागरिकले आफूहरूलाई नमात्तिने गरी र पुराना दललाई सच्चिने गरी मत दिएको बताए । 

‘कतिपयले तपाईंहरूको प्राप्त गर्नुभएको मत निराशाको मत हो भन्नुभएको छ । तर म जनताले दिएको मतलाई आशाको मत हो भन्छु । यो हाम्रो दलका लागि मात्रै होइन, सम्पूर्ण दलमाथि गरिएको आशाको मत हो । योपटक जनताले जानेर वा नजानेर जसरी मत दिएका छन्, यसमा हामी जस्ता दललाई नमात्तिने गरी र पुरानालाई सच्चिने गरी मत दिनुभएको छ । यसलाई स्वीकार गरेर जानुपर्छ ।’ 

जनताको मत अनुसारको सरकार बनेको भन्दै उनले नागरिकसँग गरिएका वाचालाई सरकारको न्यूनतम् साझा कार्यक्रममा समेटेर नागरिकमा उत्साह जगाउने बताए । 

‘जुन वाचा गरेका छौं, इमान्दारीपूर्वक काम गर्न सक्यौं भने हामी जनता र नागरिकलाई उत्साह जगाउन सक्छौं,’ उनले भने, ‘अब हामीलाई कुनै छूट छैन । हामी जनताले महसूस गर्ने गरी नागरिकलाई नतिजा दिन्छौं । आशा र उत्साह जगाएर अघि बढ्छौं ।’