आशिष गौतम (सचिन) र मेलिना राईको स्वर रहेको गीत ‘पिरिम नलाउने’लाई युट्युबमा १० करोड बढी पटक हेरिएको छ ।

चार वर्षअघि सार्वजनिक गीतले युट्युबमा १ सय मिलियन प्लस भ्युज पाएको हो ।

दीपक शर्माको शब्द एवं संगीत रहेको गीतलाई नरेन्द्र वियोगीले एरेन्ज गरेका हुन् । 

सुव्रतराज आचार्यको निर्देशन, गम्भीर विष्टको कोरियोग्राफी रहेको भिडियोमा गायक आशिषसँगै अभिनेत्री वर्षा राउतको नृत्य छ । 

आफूले गाएको र अभिनय गरेको गीतले युट्युबमा १० करोड भ्युज पाएसँगै आशिष सचिनले सामाजिक सञ्जालमार्फत खुशी साटेका छन् ।

उनले यसलाई एक निरन्तर यात्राको अर्को उपलब्धि भनेका छन् ।

गीतले १० करोड बढी भ्युज पाउँदा आफूहरु एकदमै हर्षित र विनम्र रहेको उनले बताएका छन् ।

‘हजुरहरुको साथ, माया र हौसलाको आजीवन ऋणी रहने छौं । सहृदय धन्यवाद सम्पूर्ण सहयोगी, परिवार र शुभचिन्तकहरुप्रति । हजुरहरुको निरन्तर समर्थन र हामीसँग यो अद्भुत यात्राप्रति कृतज्ञ छौं’ उनले भनेका छन् ।

उत्सव दाहाल छायाँकन, नविन निरौलाको सम्पादन रहेको गीतको भिडियो ‘ओएसआर डिजिटल’को अफिसियल युट्युब च्यानलमार्फत सार्वजनिक गरिएको थियो ।