नेकपा एकीकृत समाजवादीका अध्यक्ष माधवकुमार नेपालले सुदूरपश्चिमबाट एमालेलाई धक्का दिइएको भन्दै देशैभरि यो क्रम बढ्ने बताएका छन् ।

जनसांस्कृतिक महासंघको कार्यक्रमलाई सम्बोधन गर्दै नेपालले एमालेले काम छैन भनेर आलोचना गरेको पार्टीले नै अब धक्का दिन सुरुवात भएको बताएका हुन् । 

‘नेकपा एस कहाँ छ ? यसको काम छैन भनेर एमालेका नेताले भन्थे तर सुदुरपश्चिममा नयाँ सरकार बन्यो, नयाँ सरकारमा कांग्रेस र नेकपा एकीकृत समाजवादी छन्’ उनले भने, ‘हामीसँग मान्छेहरू खुशी नभएका होइनन् तर हामीले त देखायौं । सुदूरपश्चिमबाट उदायौं । यो एमालेलाई पहिलो धक्का हो । तर यो पहिलो सुरुवात मात्रै हो । यसो हुनाले हौसला बुलन्द गरौं कमरेडहरू । निर्वाचन हामीले सोचेजस्तो नभए पनि उठाएका ५० प्रतिशत उम्मेदवार जिताएका छौं ।’ 

२० सिट गठबन्धनमा मागे पनि पूरा नभएको तर आफूहरूको उपस्थिति सम्ममानजनक भएको बताए । समानुपातिकका थेरै मतले नचुकेको भए अर्को ४ सिट बढ्ने भन्दै नआत्तिकन संगठन सृदृढीकरणमा लाग्नसमेत उनले आग्रह गरे । 

सुदूरपश्चिममा एमालेका मुख्यमन्त्री विश्वासको मत नपाइ एक महिनामा हट्नुपरेको थियो । लगत्तै कांग्रेसका कमलबहादुर शाह मुख्यमन्त्री भएका छन् ।

जसलाई नेकपा एसले समर्थन गरेको छ । ३० दिनभित्र उनले पनि विश्वासको मत लिनुपर्छ । कांग्रेस र नेकपा एस मिल्दा पनि २३ सिट मात्रै हुन्छ । तर बहुमतका लागि कम्तिमा २७ सिट आवश्यक पर्छ ।