राष्ट्रपति निर्वाचनको तयारीका विषयमा नेकपा माओवादी केन्द्र र जनता समाजवादी पार्टी (जसपा) नेपालका नेताबीचको छलफल शुरू भएको छ ।

सिंहदरबारमा २ दलका शीर्ष नेताबीच छलफल शुरू भएको हो । 

छलफलमा प्रधानमन्त्री प्रचण्डसहित माओवादीबाट वरिष्ठ उपाध्यक्ष नारायणकाजी श्रेष्ठ र सचिव शक्ति बस्नेत सहभागी भएका छन् । जसपाबाट अध्यक्ष उपेन्द्र यादव र नेता राजेन्द्र श्रेष्ठ सहभागी छन् । 

राष्ट्रपति चुनावअघि नै नयाँ समीकरण बनाउने प्रयासस्वरूप दलहरू छलफलमा जुटेका छन् । प्रधानमन्त्री प्रचण्डले बिहीवार नेकपा एकीकृत समाजवादीका नेतासँग सिंहदरबारमा नै छलफल गरेका थिए । 

दलहरूसँग छुट्टाछु्ट्टै छलफल गरेपछि कांग्रेस, माओवादी, नेकपा एस, जसपासहित नेताको बैठक बस्ने बताइएको छ । यस्तो बैठक बिहीवार नै बस्ने तयारी भए पनि बस्ने सम्भावना कम रहेको बताइन्छ ।

प्रचण्डले राष्ट्रपति चुनावमा नेकपा एस, जसपा सहितका धारणा बुझेपछि कांग्रेससँग फेरि छलफल गर्ने तयारी गरेका छन् ।