सभामुख देवराज घिमिरेले महिलाहरूको सहभागिता र सक्रियताअनुसार प्रचार हुन नसकेको बताएका छन्। 

शुक्रवार अन्तर्राष्ट्रिय महिला दिवसको अवसरमा आयोजित मिडियामा महिलाका विचार गोष्ठी कार्यक्रममा उनले संसद र अन्य संघसंस्थाहरूमा पनि महिलाहरूको सक्रियता र सहभागिता बढिरहेको भए पनि सञ्चारमाध्यमहरूले सोअनुसार प्रचारप्रसार नगरेको गुनासो गरे।

उनले आफू सभामुख भइसकेपछि संसद बैठकमा पनि महिला सांसदहरू शून्य र विशेष समयमा उल्लेख्य सक्रिय र सहभागी भए पनि सञ्चारमाध्यमहरूले सक्रियताअनुसार प्रचार गर्न कन्जुस्याईं गरेका बताए। 

सञ्चारमाध्यमहरूले विशेष नेता र चर्चामा आएका विषयवस्तुबाहेकका समाचार नबनाएको उनको भनाइ थियो।

सभामुख घिमिरेले संसदले संसदमा महिलाहरूका लागि अस्थायी प्रकृतिका केही संरचना जरुरी रहेको र त्यो निर्माण गर्नेगरी संसद सचिवालयसँग कुरा गरी महिलालाई मिडिया फ्रेण्डली बनाउन विभिन्न कार्यक्रम निर्माण गर्ने योजनामा आफू रहेको बताए।